Azərbaycanı dəstəkləməyən dostları - Ermənistana fürsət yaratdılar

Tarix: 20 Aprel 2021 10:32

30 il bundan əvvəlki Azərbaycan yoxdur. Artıq güclü, öz ayaqları üstə duran, müstəqil siyasət yürüdən və dünyadan açıq şəkildə ədalət tələb edən, dünya susduğu, biganə qaldığı anda isə öz haqqını öz gücü hesabına əldə edən Azərbaycan var. Ermənistanın isə bu reallıqla barışmaqdan başqa çıxış yolu yoxdur. Buna baxmayaraq Qarabağ mövzusu ətrafında hələ də düşmənin manipulyasiya cəhdlərinin şahidi oluruq. Qarşı tərəf yeni reallığın strateji planlarına nəinki adekvat davranmır, hətta 44 günlük müharibə ilə darmadağın edilən fokuslanmış keçmiş baxışından da əl çəkmək niyyətində deyil.

II Qarabağ müharibəsində qazanılan Zəfərin hüquqi və ideoloji mahiyyətinin ikili standartların hələ də üstünlük təşkil etdiyi qlobal sferaya düzgün çatdırılması Ermənistanı məğlub etmək qədər strateji əhəmiyyət daşıyır. Lakin təəssüflər olsun ki, istər 44 günlük müharibə zamanı, istərsə də postmüharibə mərhələsində hələ də bəzi ölkələrdən Azərbaycanın haqq səsini qlobal sferaya çatdırmaq üçün gözlənilən dəstəyi görmürük. Ötən gün Strasburqda baş tutan Avropa Şurası Parlament Assambleyasının (AŞPA) yaz sessiyası belə deməyə əsas verir.

Ermənistanın kapitulyasiyası kimi də təqdim edilən 10 Noyabr üçtərəfli bəyanatının üzərindən 5 aydan çox müddət keçməsinə baxmayaraq rəsmi İrəvan bütün qüvvəsi ilə sənəddə nəzərdə tutulan bəndlərin icrası məsələsini ləngitmək üçün müxtəlif manipulyativ addımlardan əl çəkmək fikrində deyil. Bunun təsdiqi kimi AŞPA-da Ermənistanın istəyi ilə "əsirlər" məsələsinin gündəliyə salınması üçün səsverməyə qoyulmasını göstərmək olar. 

Bir daha göründü ki, Ermənistan tərəfi hər fürsətdə dilə gətirdiyi "hərbi əsirlər" mövzusu ilə bağlı yalan və iftira dolu ritorikadan çəkinmək niyyətində deyil. Dünənki hadisələr rəsmi İrəvanın imza atdığı üçtərəfli bəyanatdan bir ay sonra Azərbaycan ərazilərinə terrorçuluq məqsədilə göndərilən diversant qrupun üzvlərinin "hərbi əsir" adlandırılaraq onları Azərbaycandan geri almaq üçün başlatdığı mübarizənin davamı idi. 

Ermənistanın isə üçtərəfli razılığa zidd olaraq, pozucu fəaliyyəti ilə bağlı üzrxahlıq bildirmək əvəzinə, əsassız iddialarla çıxış etməsi, Azərbaycana qarşı yalan və iftira dolu kampaniya aparması bu ölkənin hələ də düşmənçilik mövqeyindən çıxış etdiyini, beynəlxalq hüquq əsasında münasibətlərin normallaşdırılmasına hazır olmadığını və beləliklə də yaxın keçmişdə baş verənlərdən nəticə çıxarmadığını nə qədər nümayiş etdirirsə, sessiyada Ermənistanın istəyi ilə "əsirlər" məsələsinin gündəliyə salınması üçün səsvermədə iştirak edən ölkələrdən Azərbaycanın tam olaraq gözlənilən dəstəyi görməməsi bir o qədər üzücüdür.

Azərbaycanın mövqeyini 23 deputat (Türkiyə, Rusiya, Macarıstan və Serbiyalı deputatlar) dəstəklədiyi halda, məsələnin plenar iclasda müzakirə edilməsinin lehinə 93 səs verilib, bitərəf səslərin sayı isə 18 olub. Burada əraziləri işğala məruz qalan, Azərbaycanın 30 il üzləşdiyi problemi yaşayan Ukrayna, Moldova və Gürcüstanın faktiki olaraq  səsvermə zamanı Avroparlament və Aİ mövqeyindən çıxış edərək Ermənistanın "əsirlərlə" bağlı mövqeyinə mane olmamaqları məqamı xüsusi diqqət çəkib.

Digər diqqət çəkən məqam isə son zamanlar rəsmi Bakının narazı olduğu Rusiyalı nümayəndə heyətinin mövqeyidir. Rusiyalı parlamentarilərin Azərbaycanın xeyirinə mövqe nümayiş etdirmələrini 3 əsas səbəblə izah etmək olar:

I. Bu, 10 Noyabr bəyanatında imzası olan üç tərəfdən biri kimi Kreml sahibinin imzasına sadiq olduğunu, vədinə əməl etdiyini nümayiş etdirmək baxımından fürsət idi.

II. Sessiya çərçivəsində "Aleksey Navalnının 2021-ci ilin yanvarında həbsi" mövzusunda keçiriləcəyi gözlənilən debatda Azərbaycanın dəstəyini almaq

III. Şuşada qalıqları aşkar edilən "İsgəndər-M" operativ taktiki raket kompleksi ətrafında böyüyən qalmaqala görə rəsmi Bakıdan bəraət almaq

Gün kimi aydın görünür ki, bəzi Qərb dövlətləri, Avropa Parlamenti, Avropa İnsan Hüquqları Məhkəməsi, ABŞ Konqresi və digər strukturlarda əyləşən lobbistlər məğlub Ermənistanı reablitasiya etmək üçün bütün resuruslarını, gücünü ortaya qoyublar. "Əsir" mövzusunun AŞPA-da müzakirəyə çıxarmaq cəhdlərinə imkan yaradanlar isə anlamalıdrlar ki, bu, erməni dəyirmanına su tökmək, onun işğalçılıq, terrorçuluq siyasətini dəstəkləməklə yanaşı, regionda sülhə təhdiddən başqa bir şey deyil. 

Təhməz Əsədov