Bədii gimnastika ulduzları yenidən Bakıda çıxış edəcəklər - VİDEO

Tarix: 1 May 2021 09:58

2021-ci il mayın 7-9-da Milli Gimnastika Arenasında bədii gimnastika üzrə Dünya Kuboku keçiriləcək.

Sonxeber.net bu barədə Azərbaycan Gimnastika Federasiyasının saytına istinadən məlumat verir.

Yarış Tokioda keçiriləcək yay Olimpiya Oyunları üçün təsnifat xarakteri daşıyır.

Azərbaycanı Dünya Kubokunda Yay Universiadasının gümüş medalçısı, İslam Həmrəyliyi Oyunlarının qızıl medalçısı, Olimpiya Oyunlarına lisenziya qazanmış Zöhrə Ağamirova, gənclər arasında dünya çempionatının ikiqat mükafatçısı Arzu Cəlilova, eləcə də son Avropa çempionatının üçqat medalçısı, Olimpiya Oyunlarına lisenziya qazanmış qrup hərəkətləri komandası (Ləman Əlimuradova, Zeynəb Hümmətova, Yelizaveta Luzan, Məryəm Səfərova, Darya Sorokina) təmsil edəcək.

Dünya Kubokunda 36 ölkədən qrup komandaları tərkibində 106 (18 qrup) və fərdi proqram üzrə 63 fərdi gimnast mübarizə aparacaq.

Yarışda Katerina Qalkina (Belarus), Katrin Taseva və Boryana Kaleyn (Bolqarıstan), Nikol Zelikman və Linoy Aşram (İsrail), Aleksandra Acurcukuleze və Milena Baldassarri (İtaliya) kimi bədiii gimnastika ulduzları iştirak edəcək.

Ənənəyə uyğun olaraq yarışlarda ən çox xal toplamış gimnasta "AGF Trophy" kuboku təqdim olunacaq.