Sakinləri üz-üzə qoyan artezian quyusu - VİDEO

Tarix: 2 Sentyabr 2021 16:56

Bərdə Kətəlparaq kənd sakini Yalçın Məmmədovun qaynar nömrəmizə göndərdiyi şikayət videosunu təqdim edirik.

Sonxeber.net Real TV-yə istinadən xəbər verir ki, məsələyə aydınlıq gətirmək üçün əvvəlcə Kətəlparaq kənd icra nümayəndəsi Ədalət Allahyarovla əlaqə saxladıq. İcra nümayəndəsi sakinlər arasında belə xoşagəlməz halın yaşandığını təsdiqlədi. Bildirildi ki, Etibar xanım həmçinin Qarabağ Müharibəsi Əlilləri, Veteranları ve Şəhid Ailələri İctimai Birliyinin Bərdə rayon filialının sədri və sakinlərin hörmət etdiyi sahibkardır. İcra nümayəndəsi onu da əlavə etdi ki, problemin əsas səbəbi bir artezian quyusunun təsərrüfata kifayət etməməsindədir.

Daha sonra adıçəkilən sahibkar xanım Etibar Hüseynova ilə əlaqə saxladıq. Etibar xanım məsələyə aydınlıq gətirdi.

Məsələyə son nöqtəni qoymaq üçün Bərdə Suvarma Sistemləri İdarəsinin mövqeyini də öyrəndik. İdarənin müdiri Sərdar Əhmədov adıçəkilən Etibar Hüseynovanın vaxtilə artezian quyusunu təmir etdiyini təsdiqlədi. Onu da bildirdi ki, suyun hamıya çatdırılması üçün su birlikləri qrafik tərtib edib, bütün sahələrin suvarılmasına nəzarət edirlər. Lakin problem qaçılmazdır. Çünki yay ayları ərzində müşahidə edilən quraqlıq Kətəlparaq kəndindən yan keçməyib. Artezian quyusu bir saat ərzində 120 kubmetr su vurmalı olduğu halda, indiki şəraitdə bu rəqəm 70 kubmetrə bərabər olur. Eyni zamanda indiyə qədər suvarma üçün istifadə olunan kəhriz suları da bu il istənilən səviyyədə olmayıb. Sərdar Əhmədov daha bir artezian quyusunun qazılması ilə bağlı müraciət ünvanladıqlarını qeyd etdi. İnanaq ki, məhz bundan sonra problem kökündən həll olunacaq.