Azərbaycan Ordusunun gücünə güc qatan hadisə - Yeni bölmələrin fərqi...

Tarix: 2 Noyabr 2021 15:12

"44 günlük Vətən müharibəsində biz bir qalibiyyət əldə etdik, amma təbii ki, prosesdur gərəyi istənilən naliyyətin davamı olaraq son fəaliyyət təhlili həyata keçirilməli idi".

Bunu Sonxeber.net-a açıqlamasında hərbi ekspert, ehtiyatda olan polkovnik Ruslan İmamquliyev deyib.

Polkovnik bildirib ki, Azərbaycanda bundan sonra XTQ-kimi digər bölmələr də Silahlı Qüvvələrimizin daha çevik və dinamik bir struktura çevrilməsinə şərait yaradacaq:

"Bunun nəticəsi olaraq orduda bir sıra dəyişikliklər görürük. Bu qismdən də KOMANDO bölmələrinin yaradılması məhz bu istiqamətdə görülən fəaliyyətlərdən biridir. Bu gün Azərbaycan relyefinə, regionda və dünyada gedən siyasi gedişata baxsaq artıq Azərbaycan Ordusunda bir sıra dəyişikliklər edilməlidir ki, onların da başında kəmiyyətdən ziyadə keyfiyyətə diqqət yetirilməsi çox önəmlidir. 

Döyüşlərdə də əldə olunmuş təcrübə onu göstərdi ki, xüsusən də dağlıq ərazidə əməliyyatların icra olunmasında Xüsusi Təyinatlı Qüvvələrin müstəsna rolu var. Bu cür KOMANDO bölmələrinin təşkil olunması o deməkdir ki, havada, quruda, dənizdə istənilən şəraitdə, istənilən şəkildə əməliyyatlara cəlb olunmasına və XTQ ilə kordinasiya edə biləcək bölmələrin yaradılmasına zərurət yaranır. KOMANDO bölmələri də bu cür bölmələrdən biridir və onların keçdiyi təlimlər aşağı-yuxarı XTQ-nin keçdiyi təlimlərlə bərabər və yaxud da eyni sayıla bilər. 

KOMANDO bölmələri ilə XTQ-ni fərqləndirən bir sıra cəhətlər var. KOMANDO bölmələrində müddətli həqiqi hərbi xidmət qulluqçuları da xidmət apara bilər, amma XTQ-də əsasən rütbəli hərbi qulluqçular xidmət aparır. Bu da o deməkdir ki, XTQ-də daha çox təlim keçmiş, daha çox təcrübəsi olanlar xidmət aparır. Bu o demək deyil ki, KOMANDO bölmələrində xidmət edənlərin təcrübəsi az olacaq. Sadəcə olaraq KOMANDO bölmələrinin qısa müddətdə, ən azı XTQ-nin keçdiyi təlimləri keçməsi və o səviyyəyə gəlməsi, eyni zamanda çətin əməliyyat şəraitində onlarla birgə əməliyyatlarda iştirak edə bilməsi gərəkir ki, bu da o deməkdir ki, Azərbaycan Silahlı Qüvvələri bundan sonra sadəcə Xüsusi Təyinatlı Qüvvələrə deyil, onunla yanaşı digər bölmələrin də bu cür təlimlər keçirməsi ilə bütün Silahlı Qüvvələrimizin çevik və dinamik bir struktura çevrilməsinə şərait yaradacaq. Bunu hyata keçirmək üçün də Ali Baş Komandanın qeyd etdiyi bir məqam var ki, həm müharibənin gedişatında, həm də müharibədən sonra dedi ki, artıq Azərbaycan Ordusunda Türkiyə Ordusu təcrübəsində bir səra dəyişikliklər həyata keçiriləcək. Biz hazırda o deyilənləri görməkdəyik. Hansı ki, hərbi qulluqçularımız rütbəsindən asılı olmayaraq mütəmadi olaraq Türkiyədə KOMANDO kurslarını keçərək artıq ordu sıralarına geri qayıdırlar. O deməkdir ki, bu proses geniş miqyasda bütün Orduya siraət edəcək.

Ordunu kəmiyyət olaraq artırmaqdan ziyadə, mövcud hərbi qulluqçuların keyfiyyətinə diqqət yetirilməsi önəm daşımaqdadır. Bu, Azərbaycan üçün çox lazımdır. Baxmayaraq ki, biz torpaqlarımızı işğaldan azad etdik, amma mövcud olduğumuz coğrafiya və yaşadığımız tarixi xronologiyaya baxsaq hər bir zaman ölkəmizə qarşı təhdidlər mövcud olub. Hətta özünü dost adlandıranlar da bir çox hallarda düşmən olaraq qarşımıza çıxıb. Buna görə də Azərbaycan xalqı, Azərbaycan dövləti öz həmrəyliyini bundan sonrakı dönəmdə də göstərməlidir və bu cür təlimlərə cəlb olunan mütəxəssislər və hərbi qulluqçuların qarşısında da əsas prioritet məsələlərdən biri könüllülük prinsipidir.

KOMANDO hərbi hissələri ilə XTQ hərbi hissələrinin fərqlərindən biri də odur ki, xüsusi təyinatlılarda tamamilə könüllük əsasdır və könüllü olmadıqca bu cür hərbi hissələrə cəlb oluna bilmirsiniz. Amma KOMANDO hərbi hissələri də, müddətli həqiqi hərbi xidmət qulluqçuları da xidmət edə bilirlər. Buna baxmayaraq yenə də Azərbaycan xalqı bu cür hərbi hissələrin yaradılmasına sevinməlidir, öz övladlarının bu cür hərbi hissələrdə xidmət etmələri ilə qürur hissi keçirməlidirlər".

Təhməz Əsədov