Rəşad Sadıqov: “Futbolçularda öz güclərinə şübhə yaranır” - MÜSAHİBƏ

Tarix: 20 Noyabr 2021 19:30

"Oyuna təmkinli başladıq. Rəqibin son matçlarda bu sistemdən istifadə etdiyini bilirdik". 

Sonxeber.net apasport.az-a istinadən bildirir ki, bu sözlər "Zirə"nin baş məşqçisi Rəşad Sadıqova məxsusdur.

39 yaşlı çalışdırıcı Azərbaycan Premyer Liqasının XI turunda "Səbail" üzərində 3:1 hesabı ilə qalib gəldikləri görüşdən sonrakı mətbuat konfransında komandasının çıxışını dəyərləndirib: "Bütün komandalar ikinci zonada pressinq tətbiq edir, təhlükəli əks-hücumlar qurur. Biz də təmkinli başlamağa qərar verdik. Daha çox topa nəzarət edərək, rəqibin dinamikasını aşağı salmağa çalışdıq. İkinci hissədə daha açıq və baxımlı futbol getdi. Yaxşı qol imkanlarımız oldu, yararlana bimədik. Fasilədən sonra oynamaq həmişə çətindir. İstər-istəməz oyun ritmindən düşürsən. Bu baxımdan bugünkü oyuna görə çox narahat idim. Rəqibin də aldadıcı görüntüsü var. Bəlkə kimsə düşünə bilər ki, "Səbail"lə qarşılaşırsan, rahat olacaq. Əksinə, çempionatın ən vacib oyunu kimi, ən çətin rəqibə qarşı çıxış edəcəyimiz kimi hazırlaşırdıq. Çox vacib 3 xal qazandıq".

- Volkov yaxşı forma yığıb, həm çempionatın bombardiridir, həm də artıq Gürcüstan millisinə çağırılır. Meneceri də açıqlamasında bildirib ki, ona sərfəli təkliflər var. Onu komandada saxlamaq çətin olmayacaq?
- Bu barədə düşünmürəm. Başlıq kimi gördüm, amma xəbərin içini oxumadım. Hər bir futbolçuya komandaların təklifi, istəyi kimi xəbərlər oxuyuruq. Futbolun içində olan şeylərdir. Bizdə hər hansı məlumat yoxdur, Volkovun özündən də eşitməmişik. Hər bir futbolçumuz kimi, Volkov da bizim üçün dəyərlidir. Əvvəl də düşünürdüm ki, onun üçün ən yaxşı mövqe hücumdur. Hücumçu üçün yaxşı keyfiyyətləri var. Oyundan-oyuna, mövsüm getdikcə ön xətt oyunçusu kimi daha da inkişaf elədi. Artıq nominal hücumçuya çevrilib. Hətta mənə də suallar verilir ki, nominal hücumçun yoxdur, niyə almırsan? Volkova inanırdım, bu gün də etimadımızı doğruldub. Düşünürəm ki, "Zirə"də bundan da yaxşı işlər görə bilər. Yetər ki, bu tempdə, bu istəklə peşəkar şəkildə işinə davam eləsin. Volkov bizdə xoşbəxtdir. Ağıllı-kamallı insandır, bilir ki, oyunu bu komandada nə dərəcədə yaxşı alınır. Hücum xəttində onun keyfiyyətləri üzərində istifadə edirik. Hər bir futbolçu daha yaxşı, çempionatda oynaya bilər. 

- Volkovun müqavilə müddəti mövsümün sonuna qədərdir. Yeni sazişlə bağlı onunla danışıqlara başlanılıb?
- Xeyr, heç bir danışığımız olmayıb. Bir neçə futbolçunun müqaviləsi mövsümün sonunda bitir. Gedişata baxacağıq, hansısa futbolçu ilə yeni sözləşmə imzalamaq istəsək, qarşılıqlı şəkildə razılıq əldə edilsə, komandada saxlayacağıq. Özüm də bu proseslərin tez olduğunu düşünürəm. Yalnız qarşıdakı oyuna köklənməliyik. Fikrimizi qəti şəkildə bu tip məsələlərlə dağıtmamalıyıq. Hər şeyin öz vaxtı var.

- Komanda sizin istədiyiniz futbolun neçə faizini sərgiləyir?
- Bəzi dəqiqələrdə tam mən istəyən oyunu göstəririk. Amma bəzən oyun nizam-intizamından qopuruq. Bəzən psixoloji cəhətdən qorxu gəlir, futbolçularda öz güclərinə şübhə yaranır, bəzən isə rahatlıq gəlir. Ən vacibi komandanı mental şəkildə hazırlamaqdır. Futbolçularıma güvənirəm. Tapşırıqlarımı yüksək səviyyədə yerinə yetirməyə çalışırlar. Potensialları var, komandamız yaxşı futbolçulardan qurulub. Düzdür, heyətimiz kasaddır. Məsələn, hücumçularımız yorulanda sistemi dəyişməyə məcbur oluruq, müdafiəçi buraxırıq. Qışda bu yöndə işlər görmək, alınsa heyətimizi daha da genişləndirmək istəyirik. Çünki mənim xüsusilə xoşladığım sistemlərdən biri 4-2-3-1-dir. Bu sxemlə meydana çıxanda isə, demək olar ki, ehtiyatda heç kim qalmır ki, əvəzetmədən hücumu gücləndirək. Filipe Paxtmanın zədələnməsi də planlarımızı alt-üst elədi. Bu yöndə işlər görməliyik. Nə dərəcədə effektli olub-olmayacağını zaman göstərəcək.