Toyota və Suzuki ittifaq müqaviləsi bağlayır

Tarix: 28 Avqust 2019 20:40

Bakı. Trend:

Yaponiyanın iki böyük avtomobil istehsalçısı - Toyota Motor Corp. və Suzuki şirkətləri bir-birinin səhmlərini satın alacaqları ittifaqın yaradılması barədə razılaşma imzalayıblar.

Trend-in məlumatına görə, Toyota Suzukinin 4.9% payını 96 milyard yen (907 milyon dollar), Suzuki isə açıq bazarda Toyota'nın səhmlərini 48 milyard yen (453.6 milyon dollar) alacaq. Alyansın məqsədi yeni sahələrdə, o cümlədən avtonom idarəetmə sahəsində əməkdaşlığı inkişaf etdirmək üçün iki şirkət arasında uzunmüddətli tərəfdaşlıq qurmaq və təşviq etməkdir.

Qeyd olunur ki, şirkətlər yeni sahələrdə əməkdaşlığı yaratmaq və dərinləşdirməklə avtomobil sektoru üçün yeni çətinlikləri dəf edərək davamlı inkişafa nail olmaq niyyətindədirlər.

Hesabatda deyilir ki, eyni zamanda, şirkətlər hər bir şirkətin ixtisaslaşdığı texnologiyaları və məhsulları inkişaf etdirməklə rəqib olaraq qalacaqlar.

Xatırladaq ki, Toyota Motor Corporation Toyota qrupunun ən böyük bölməsidir və Yaponiyanın avtomobil sənayesində liderdir. Şirkət 1937-ci ildə qurulub, baş ofisi Toyota şəhərində, Ayçi prefekturasındadır.

Suzuki Motor 1909-cu ildə yaradılıb. Qərargahı Hamamatsuda yerləşir.

Trend-in ən mühüm və maraqlı xəbərlərini "Telegram"da izləyin