Heydər Əliyev Fondunun dəstəyi ilə keçirilən Azərbaycan üzüm və şərab festivalı davam edir (VİDEO)

Tarix: 31 Avqust 2019 16:20

Bakı. Trend:

Şamaxının Meysəri kəndi ərazisindəki “Şirvan şərabları” MMC-nin üzümçülük və şərabçılıq kompleksində açılan Azərbaycan üzüm və şərab festivalı avqustun 31-də davam edir.

Heydər Əliyev Fondunun dəstəyi, Kənd Təsərrüfatı Nazirliyi, Şamaxı Rayon İcra Hakimiyyəti, “Regional İnkişaf” İctimai Birliyi, Dövlət Turizm Agentliyi və Azərbaycan Milli Xalça Muzeyinin birgə təşkilatçılığı ilə respublikamızda keçirilən ilk bu cür festival yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda şərab istehsalı tarixinin geniş ictimaiyyətə çatdırılması məqsədini daşıyır.

Avqustun 31-də səhər saatlarında keçirilən yoqa, streçinq, eləcə də açıq havada şərq döyüşləri üzrə səhər məşqi hər kəsdə xoş təəssürat yaradıb. Festivalın rəmzləri olan çeşidli dekorasiyalar, instalyasiyalar ilə bəzədilən ərazidə yerli şərab istehsalçılarının dequstasiya pavilyonları, habelə qastronomik və etno zonalar iştirakçılar tərəfindən böyük maraqla qarşılanıb.

Festivalda iştirak edən şərab istehsalçıları xüsusi bəzədilən çətir altında öz müəssisələrinin məhsullarını nümayiş etdirir, bu məhsulların dequstasiyasını keçirirlər.

Festival davam edir.

Trend-in ən mühüm və maraqlı xəbərlərini "Telegram"da izləyin