Saçların qeydinə qalmaq vaxtıdır

Tarix: 6 Fevral 2022 14:30

Havalar soyuduqca saçların qeydinə qalmaq, onları nəmləndirmək, qırılan ucları azaltmaq, rəngi canlandırmaq, itirdiyi parlaqlığı bərpa etmək ehtiyacı artır.

Sonxeber.net Axşam.az-a istinadən ev şəraitində təbii vasitələrlə saça qulluq üsullarını təqdim edir.

1. Avokado

Yarım avokadonu əzin və üzərinə bir neçə damcı nanə yağı əlavə edib qarışdırın. Saçınızı yuduqdan sonra maskanı çəkin. 15 dəqiqə gözləyib yuyun. Bu maskadan sonra saçlarınız yumşalacaq. Saçlarınız çox qurudursa, bu maskaya 1 yumurta sarısı və ya 1-2 xörək qaşığı qatıq əlavə edə bilərsiniz.

2. Kokos yağı

Bir xörək qaşığı kokos yağı götürüb nəm saçın uclarına çəkin. Əgər saçlarınız həddindən artıq qurudursa, yağı saçınızda bir gecə də saxlayın və səhər yuyun.

3. Banan və zeytun yağı

Bananı 1 xörək qaşığı zeytun yağı ilə qarışdırıb püre halına gələnə qədər əzin. Saç diblərini masaj edərək maskanı dəriyə qədər hopdurun. 30 dəqiqə gözlədikdən sonra yuyun.

4. Balqabaq və bal

Bir stəkan balqabaq püresinə 1-2 xörək qaşığı bal  əlavə edin. Saçınıza və baş dərinizə çəkin. Maskanın təsirini artırmaq üçün 15 dəqiqə örtülü şəkildə saçda saxlayıb, yuyun. Bu maskanı üzünüzə də çəkə bilərsiniz.

5. Kakao

Qəhvəyi saçlarınız varsa, rəngi canlandırmaq üçün kakaodan istifadə edə bilərsiniz. Kakao, adi qatıq, bal və alma sirkəsinin birləşməsi saç rəngini daha parlaq edəcəkdir.