Növbəti pandemiyanın qarşısını necə almaq olar? - Bill Qeyts bununla bağlı kitab yazdı

Tarix: 9 Fevral 2022 20:24

Microsoft şirkətinin qurucusu, milyarder Bill Qeyts "növbəti pandemiyanın qarşısını necə almalı?" adlı kitab yazıb.

Milli.Az xəbər verir ki, bu haqda informasiyanı TASS agentliyi yayıb.

"Mən COVID-19-u yarandığı gündən izləyirəm, Qeyts Fondunun ekspertləri, daha ədalətli reaksiyanın tərəfdarı olan və onilliklər ərzində yoluxucu xəstəliklərlə mübarizə aparan kənar mütəxəssislərlə işləyirəm.

Bu iş zamanı mən pandemiya və növbəti pandemiyadan necə qorunmaq barədə çox şey öyrəndim və bu bilikləri insanlarla bölüşmək istəyirəm. Buna görə də, pandemiyadan daha heç kimin əziyyət çəkməməsinə necə əmin ola biləcəyimiz haqqında kitab yazmağa başladım", deyə agentlik Qeytsin şəxsi bloq yazısından sitat gətirib.

Sahibkarın sözlərinə görə, mayın 3-də işıq üzü görəcək kitabda o, bəşəriyyətin koronavirus pandemiyasından öyrənə biləcəyi dərslərdən, insanların həyatını xilas etmək üçün lazım olan yeniliklərdən, virusun yayılmasının vaxtında qarşısını almaq üçün istifadə olunan vasitələrdən bəhs edir. 

Bundan əlavə, Qeyts ABŞ Milli Allergiya və Yoluxucu Xəstəliklər İnstitutunun direktoru Entoni Fauçi və Ümumdünya Səhiyyə Təşkilatının baş direktoru Tedros Adanom Qebreyesus ilə söhbətlərindən yazıb.

Milli.Az