Mariupolda bir dənə də olsun salamat bina qalmadı, insanlar gölməçələrdən su içirlər - Mer müavini

Tarix: 17 Mart 2022 12:24

Donetsk vilayətinin Mariupol şəhərində rus əsgərlərin hərəkətləri nəticəsində bir dənə də olsun bina toxunulmaz qalmayıb.

Milli.Az UNİAN-a istinadən bildirir ki, bunu "Forbes Ukraine" jurnalına müsahibəsində mer müavini Sergey Orlov deyib.

"Hesab edirəm ki, 80-90 % bombalanıb. Zərərsiz bir bina yoxdur. Ya dağıdılıb, ya da zədələnib", - Orlov bildirib.

Onun sözlərinə görə, blokada zamanı şəhərdə 350-400 min nəfər qalıb. İnfrastruktur demək olar ki, işləmir və sakinlər su çatışmazlığından əziyyət çəkirlər - onlar artıq qarı əridiblər, gölməçələrdən suyu yığıblar, evdəki radiatorlardan da su çıxarıblar.

"Özəl sektorda çalışan insanların az bir hissəsi quyudan su götürə bilir. Üstəlik, insanların istiliyi yoxdur, istilik sistemlərindən suyu çəkib, bu sudan istifadə edirlər. Şəhərdə üç-dörd bulaq da var, orada su var. Bələdiyyə xidmətləri oradan suyu götürüb mərkəzdəki bir neçə nöqtəyə çatdırır. Amma yarım milyonluq şəhər üçün o bulaqlar kifayət etmir", - deyə bələdiyyə sədrinin müavini bildirib.

Orlov deyir ki, şəhərin humanitar dəhlizə və evakuasiyaya çox ehtiyacı var.

"Biz şəhər rəhbərliyi olaraq bir şeyi istəyirik. Humanitar dəhliz açılsın və biz ora humanitar yardım çatdıra bilək. 11 gündür ki, ora çatdırmağa çalışırıq! Son humanitar karvanımız dörd gündür yoldadır, ruslar isə Mariupola buraxmırlar. Avtobuslar da var. Hər gün üç min insanı təxliyə etməyə hazırıq. Bizə vermirlər. Çıxış yolu nədir? Bizə humanitar yardım gətirməyə imkan verin. İmkan verin, getmək istəyəni şəhərdən çıxaraq. Biz bunu etməyə hazırıq. Onlar bunu etməyə hazır deyillər", - deyə bələdiyyə sədrinin müavini bildirib.

"Ukrayna ordusu ilə birbaşa qarşıdurmada artıq qələbənin olmayacağını anlayaraq, onlar bu cür dəhşətli qurbanlar və dağıntılar vasitəsilə bir növ təslim olmağa məcbur etməyə çalışırlar. Mülki insanları, infrastrukturu məhv etməklə. Onlar Ukrayna ordusu ilıə deyil, əhali ilə mübarizə aparırlar", - o əlavə etdi.

Aslan Məmmədov
Milli.Az