Nəsibə Zeynalovanı bir evin damına qaldırıb o birinə keçirmişdilər ki... - FOTO

Tarix: 20 Aprel 2022 17:50

"Bu gün teatra girəndə nəinki Nəsibə Zeynalovanın, dünyasını dəyişən aktyorların hər birinin yoxluğunu hiss edirəm".

Sonxeber.net xəbər verir ki, bunu qaynarinfo-ya açıqlamasında Əməkdar artist Çingiz Əhmədov Xalq artisti, mərhum Nəsibə Zeynalova ilə bağlı xatirələrini bölüşərkən deyib.

Aktyor eyni zamanda Nəsibə xanım Zeynalova ilə qohum olduğunu bildirib:

"Nəsibə Zeynalova ilə yaxın qohumuq, nənəmlə dayı qızı-bibi qızı olublar. Nəsibə xanımla xatirələr bitmir. Mən onu verilişlərimə dəvət edirdim.  Onu "Yeriniz məlum" verilişinə dəvət etmişdim. Təsadüfən yaşadığı evin lifti işləmirdi. Prodüsser onun arxasınca getmişdi. Nəsibə xanımı bu binanın damından o biri binanın damına keçiriblər və ordan lift ilə aşağı düşüb ki, verilişə gələ bilsin. Bunu hər aktyor etməz.   

Onun Xudatda bir rəfiqəsi vardı, biz ora tez-tez gedib-gələrdik. Növbəti görüşlərin birində Nəsibə xanım dedi ki, susamışam, oradan bir su al. Maşından düşəndə camaat məni görüb üstümə qaçırdılar, hamı görüşürdü. Suyu götürüb gələndə gördüm ki, həmin camaat maşının başına yığılıb. Görüblər ki, Nəsibə Zeynalova maşındadır, hamı da görüşmək istəyib. Orada bir ləzgi kişi Nəsibə xanıma yaxınlaşdı və dedi: "Nəsibə xanımcan". Nəsibə xanım da dedi ki, nə  var adə? Dedi: "İcazə verin, əlinizdən öpüm". Dedi ki, olmaz adə, lazım deyil.  Kişi qayıtdı ki, sənə qurban olum, ver əlini öpüm. Ləzgi kişi onun əlindən yapışıb öpdü. Nəsibə xanım tez əlini çəkdi. Ləzgi də ona qayıtdı ki, indi rahat ölə bilərəm. Onunla bağlı xatirələr bitib-tükənməz.  Mən belə sənətkarlarla işləmişəm. Tərbiyə, səliqə-sahman vardı, onlar gələndə biz özümüzü yığışdırırdıq, baxma ki, qohum idik. Teatra, konsertə gedirdik, Nəsibə xanım evdən bir qazan peraşki gətirərdi. Onun hamısını aktyorlara paylayardı. Ətlə olan peraşkiləri mənə verərdi, deyərdi ki, ədə, bura gəl, ətlidi, bunu yeginən". 

Çingiz Əhmədov deyir ki, dünyaya Nəsibə xanımdan gəlməyib, gəlməyəcək də:

"Çətin ki, belə bir aktrisa bir də dünyaya gəlsin. Nəsibə xanım bir qadın kimi xoşbəxt idi, gözəl əl qabiliyyəti vardı. Dadlı yeməkləri olardı, ondan həqiqətən yox idi. Sağ olun ki, onu yad etdiniz. Nəsibə xanım bütün evlərdə, yaddaşlarda yaşayır. Nə qədər ki, tamaşaları, filmləri var, onu gələn nəsillərin hamısı yad edəcək. Mən Çingiz Əhmədov kimi onun ruhu qarşısında baş əyirəm".

Qeyd edək ki, Xalq artisti, mərhum aktrisa Nəsibə Zeynalova 1916-cı ildə aprelin 20-də anadan olub.