İşdə əlini təsadüfən kəsdi, sonra hər iki ayağını itirdi

Tarix: 2 Noyabr 2022 05:22

45 yaşlı Darren Spens təsadüfən əlini zədələyərək hər iki ayağını itirib.

Sonxeber.net bildirir ki, bu barədə "Daily Mail" məlumat yayıb.

İngiltərənin Nortumberlend qraflığının Aşinqton şəhərindəki anbarda kişi karton parçalayıcı ilə işləyərkən əlini kəsib. Bir həftə sonra Spensin səhhəti kəskin şəkildə pisləşib. Qusma, ishal və taxikardiya başlayıb. "Əvvəlcə bunun öhdəsindən gələ biləcəyimi düşündüm. Amma ertəsi gün yoldaşıma dedim ki, "Eymi, məncə xəstəxanaya getməliyəm". "Xəstəxana" sözünü tələffüz edə bilmədim. O anda insult keçirdiyimi düşündüm", - deyə britaniyalı xatırlayıb.

Spens və Eymi dərhal həkimə gediblər. Kişinin dediyinə görə, o, artıq ayaqlarında hissiyyatını itirdiyini hiss edib. Həkimlər Spensi müayinə ediblər və onun kəsik zamanı daxil olan infeksiya səbəbindən inkişaf edən sepsis olduğunu aşkar ediblər. Həkimlər britaniyalını süni komaya salıblar və iltihab prosesinin inkişafını dayandırmağa çalışıblar. Lakin üç gün sonra oyanan kişi vəziyyətin daha da pisləşdiyini başa düşüb: ayaqlarının dərisi qaralıb və o, hər iki əzanın həssaslığını tamamilə itirib.

Bir ay sonra Spens bir ayağını dizdən aşağı, bir həftə sonra isə ikinci ayağını amputasiya etməli olub. Kişi etiraf edib ki, baş verənləri tez qəbul edib və indi bədən üzvləri olmadan yaşamağı öyrənib. O, bu yaxınlarda protezlər alıb və əvvəlki işinə qayıdıb. "İşə qayıtdıqdan sonra hamı deyir ki, əvvəlkindən daha xoşbəxtəm. Nədənsə özümü daha inamlı hiss edirəm. Bir çox insanlar mənim bundan utanacağımı düşünürdü", - Spens deyib. O, çətin həyat dövründə göstərdiyi dəstəyə və qayğıya görə ailəsinə və sevimli Eymiyə təşəkkür edib.

İrfan Vəliyev