Hər şeyini sataraq 25 min kilometrlik gəzintiyə çıxdı

Tarix: 18 Noyabr 2022 22:28

Şotlandiya sakini bütün əşyalarını satıb, evini tərk edib və bütün Böyük Britaniyanı gəzərək 25 min kilometrlik gəzintiyə çıxıb.

Sonxeber.net bildirir ki, kişinin yolda sevgilisi ilə necə tanış olduğu və ölkəni yenidən kəşf etdiyi haqqında "Daily Record" yazıb.

26 yaşlı şotlandiyalı Deniel Maknil orduya 2012-ci ildə qatılıb, lakin 5 ildən sonra autoimmün xəstəlik səbəbindən ordunu tərk etmək məcburiyyətində qalıb. Xəstəlik omba və onurğa sütununa təsir edib və kişinin terapiyaya ehtiyacı olub. "İşdən çıxarıldıqdan sonra məndə depressiya, narahatlıq və intihar düşüncələri yarandı. Narkomaniya və alkoqoldan asılı oldum", - o xatırlayıb.

Bir xeyriyyə təşkilatı köməyə gəlib. Onun köməyi sayəsində Deniel depressiyadan çıxıb və pis vərdişlərdən xilas olub. Həyatı yaxşılaşıb, amma tezliklə COVID-19 pandemiyası başlayıb və adam işini itirib. Həmin dövrdə bir tanışı ona gəzinti haqqında danışıb və bununla da onu oxşar səyahətə getməyə ruhlandırıb. Getməzdən əvvəl Deniel bütün var-dövlətini sataraq evi tərk edib. Səfərə başlayandan iki ay sonra o, dörd gün onunla gəzən Şarlotta adlı bir qızla tanış olub.

Şarlotta gəzintidən o qədər həzz alıb ki, tezliklə işini tərk edib və Denielə qoşulub. "Həyatımda belə bir şey edəcəyimi düşünməmişdim. Ondan əvvəl nə piyada gəzməyi, nə də gəzintiləri sevirdim. Ancaq bu, yəqin ki, həyatımda etdiyim ən yaxşı şeydir", - qız deyib.

Səyahət başlayandan bəri şotlandlar Hebrid adalarını keçiblər, Şarlotta ilə birlikdə Orkney adalarını ziyarət ediblər, Sterling, Pertdən keçərək Edinburqa çatıblar və İngiltərə ilə sərhədi keçməyə hazırlaşırlar. Denielin sözlərinə görə, səfər onun bütün gözləntilərini üstələyib. "Bu, həyatımın ən yaxşı macəralarından biridir. Təkcə mənzərəyə görə yox, daha çox insanlara görə. Hər kəs bizə qarşı inanılmaz dərəcədə mehriban idi. Məsələn, çoxları bizə isti yemək verir, gecələməyimizə icazə verirdi", - deyə o, fikrini yekunlaşdırıb.

İrfan Vəliyev