''Kaş ki, aksiyaya qoşulmaq üçün mənə də zəng etsinlər'' - Vasif Məhərrəmli

Tarix: 14 Dekabr 2022 20:30

Bir neçə gündür Azərbaycanın vətəndaş cəmiyyəti tərəfindən Şuşa-Xankəndi yolunda təşkil edilən aksiya ölkəyə səs salıb. Demək olar ki, bütün regionlardan gənc fəallar, ekoaktivistlər, QHT və media nümayəndələri aksiyaya qoşulmaq üçün Şuşa-Xankəndi yoluna axın edirlər. Bu baxımdan hər zaman fəallıqları ilə seçilən şou-biznes nümayəndələrinin aksiya iştirakçıları arasında görünməməsi təəccüb doğurur. Bəs görəsən hər kəsin müqəddəs amal üçün birləşdiyi bir vaxtda niyə Azərbaycanın tanınmış simaları aksiya iştirakçıları arasında görünmür?

Sonxeber.net xəbər verir ki, mövzu ilə bağlı konkret.az-a açıqlama verən tanınmış müğənni, "əməkdar artist" Vasif Məhərrəmli bildirib ki, hər an Şuşa-Xankəndi yolunda vətəndaşlarımızın keçirdiyi aksiyaya qoşulmağa hazırdır: "Mənə zəng edib nə vaxt getmək lazım olduğunu desələr kifayət edər. Hətta minaya düşmək bahasına belə həmin aksiyada iştirak etməyi özümə şərəf bilirəm. Kaş ki, aksiyaya qoşulmaq üçün mənə də zəng etsinlər. Bu yolda şəhid olmaq belə mənim üçün ən yüksək məqamdır".

Vasif Məhərrəmlinin sözlərinə görə, bir vətəndaş olaraq oradakı proseslərlə, gedişatla maraqlanır: "Qarabağ bizim üçün ən önəmli və prioritet məsələdir. Bu barədə müğənni həmkarlarımızla söhbət edirik. Amma aksiyada iştirakı heç ağlımızdan keçirməmişik. Çünki orada iştirak üçün icazə verilməlidir. Əgər icazə verilsə, nə xoş bizim halımıza. Böyük məmuniyyətlə iştirak edərəm. Ancaq kimə və hara müraciət edəcəyimi bilmirəm. O şaxtalı havada xəstələnmək belə mənim üçün böyük şərəfdir".

Mövzu ilə bağlı fikirlərini bölüşən sevilən müğənni Nura Suri də vətəndaş cəmiyyəti tərəfindən təşkil edilən aksiyaya qoşulmaq istədiyini deyib: "Hazırda canlı efirdəyəm deyə gedə bilmirəm. Aksiya sabaha qədər davam etsə, yəqin ki, iştirak edəcəm. Anam və atam orada döyüşüb. Hər ikisi qazidir. Amma aksiyada iştirak üçün dəvət lazımdır. Aidiyyatı dövlət orqanlarının icazəsi vacibdir. Mənə hələ ki, dəvət gəlməyib. Bundan əvvəl Şuşada konsert proqramında iştirak etmişəm. Əgər belə bir təklif olsa, təbii ki, bütün işlərimi ertələyib gedə bilərəm. Amma öz başına ora getmək mümkün deyil".

Nura Suri qeyd edib ki, aksiyada iştirak üçün hansı proseduru keçmək lazım olduğu haqda maraqlanacaq: "Maraqlanacam görüm ora keçid necədir. Bizi buraxacaqlar ya yox. Bundan sonra müğənni dostlarımla məsləhət edib getməyi düşünürəm".