Moskva üçtərəfli görüşdə nə təklif edəcək? - Markedonov

Tarix: 25 Iyul 2023 17:12

Azərbaycan-Rusiya-Ermənistan xarici işlər nazirləri Bayramov, Lavrov və Mirzoyan arasında bu gün Moskvada üçtərəfli danışıqlar aparılacaq. Rusiya XİN rəhbərinin azərbaycanlı və erməni həmkarları ilə ayrıca görüşləri də gözlənilir. İki ay əvvəl Moskvada bu ölkələr arasında hətta daha yüksək səviyyədə müzakirə aparılmışdı.

Sonxeber.net axar.az-a istinadən bildirir ki, bunu rusiyalı politoloq Sergey Markedonov deyib.

"Bu iki ay ərzində Bakı və İrəvan nümayəndələri müxtəlif məkanlarda müxtəlif formatlarda və müxtəlif səviyyələrdə görüşüblər. Kişinyovda Avropa Siyasi Birliyi çərçivəsində danışıqlar, ABŞ Dövlət Departamentinin və Avropa Şurasının vasitəçiliyi ilə Vaşinqton və Brüsseldə müzakirələr olub. Amma təəssüf ki, onların missiyası qeyri-mümkün olaraq qalır. Eyni zamanda, Bakı və İrəvan nümayəndələri arasında sərt ritorik duellər səngimir, Qarabağ ətrafında "gərgin vəziyyət" də davam edir. Münaqişə tərəfləri sülh yolu ilə nizamlanma prosesinə vasitəçilik edənlərə də narazılıqlarını bildirirlər. Moskvada danışıqlar zamanı hansı məsələlər səsləndiriləcək? Təbii ki, Rusiya ilk növbədə 2020-2022-ci illər üçün üçtərəfli bəyanatlar toplusuna diqqət yetirəcək. Məhz bunun əsasında Rusiya nizamlanma prosesini aparmaq istəyir", - o bildirib.

Markedonov qeyd edib ki, bu gün rus diplomatlar sülh müqaviləsi mövzusuna xüsusi diqqət yetirirlər:

"Moskva görüşündən on gün əvvəl (iyulun 15-də Mişelin vasitəçiliyi ilə Əliyev və Paşinyan görüşüb) Rusiya XİN-i geniş bəyanat yayıb. Sənəddə Bakı ilə İrəvan arasında sülh müqaviləsi ilə bağlı tezliklə razılaşmanın zəruriliyi xüsusi vurğulanıb. Moskva müəyyən çərçivə razılaşmasının əldə olunması anını əldən verməməyə çalışır. Həm Qərb moderatorları (xüsusən ABŞ, AB və Fransa), həm də Rusiya diplomatları bundan çox narahatdırlar. Moskva yaxşı bilir ki, Qafqazda Rusiyanın iştirakı olmadan istənilən sülh (ümumiyyətlə, istənilən formal hüquqi sənəd) onun səylərinə, imicinə və nüfuzuna güclü zərbədir. Və təbii ki, belə nəticədən qaçmağa çalışır. Ermənistan Qarabağın ərazisinin Azərbaycana mənsub olmasını bir neçə dəfə açıq şəkildə tanıyıb. Amma eyni zamanda, yekun həllin ermənilərin Qarabağ torpağından çıxarılması formatında olmamasını bildirib. Onların hüquq, eləcə də təhlükəsizlik təminatları beynəlxalq səviyyədə təsbit və təmin edilməlidir. Bakı münaqişəni tezliklə yekunlaşdırmaq istəyir. Və bu şəraitdə Moskva qalan məsələlərin həlli yollarını axtarmağı təklif edir. Təbii ki, Kreml öz vasitəçiliyini ən təsirli hesab edir".