PAŞA Bank: Müştəri hesablarının 85-87 faizi onlayn şəkildə açılır

Tarix: 31 Oktyabr 2019 11:21

Bakı. Trend:

Trend "PAŞA Bank"ın Rəqəmsal məhsullar üzrə rəhbəri Səbina Qurbanovanın müsahibəsini təqdim edir.

- Son zamanlar beynəlxalq maliyyə ictimaiyyətinin diqqətinin rəqəmsal bankçılığın inkişafına yönəldiyini müşahidə edirik. Xahiş edirik, regionumuzda və bilavasitə Azərbaycanda innovativ texnologiyaların tətbiqinə əsaslanan bank xidmətlərinin inkişaf perspektivlərini oxucularımızla paylaşasınız.

- Doğru qeyd edirsiniz, həm qlobal bazarda, həm də bizim regionda innovativ həllər diqqət mərkəzindədir. Ümumi olaraq fərdi müştərilər, kiçik və orta sahibkarlar üçün həllər çox aktualdır və trend olaraq görürük ki, banklar və fintek təşkilatları müştərilər üçün istifadəsi rahat, sürətli və mobil həllərin tətbiqi ilə məşğul olurlar. Bizim regionda da diqqət əsasən fiziki şəxslər, biznes sahibləri üçün nəzərdə tutulan həllərə verilir. Korporativ müştərilər üçün də rəqəmsal həllərdən istifadə imkanının olması çox vacibdir, lakin onlar üçün təmas nöqtələrində (touch points) insan faktorunun olması hələ də önəmlidir və korporativ müştərilərə individual yanaşma aktual olaraq qalır.

- Bildiyimiz kimi, PAŞA Bank 2018-ci ildə Azərbaycan bankları arasında rəqəmsal məhsul və xidmətlərin hazırlanması üzrə xüsusi bölmənin – Rəqəmsal Laboratoriyanın açılışı barədə elan edən ilk bank oldu. Yeni bölmənin qarşısında hansı məqsəd və vəzifələr durur?

- Ötən ilin ilk aylarında PAŞA Bankın Rəqəmsal Laboratoriyası fəaliyyətə başladı, həmin ərəfədə xarici məsləhətçilər da bu layihəyə cəlb edilmişdir. Əsas qarşımıza qoyduğumuz məqsəd isə sonrakı müddətdə bu işə yerli mütəxəssisləri cəlb etmək idi. Əslində ilk vaxtlar inanmaq çətin idi ki, yerli bazarda müştərilərin ehtiyaclarına cavab verən həllər yaradan bu qədər sayda peşəkarlardan ibarət rəqəmsal məhsul komandaları qura biləcəyik. Lakin biz buna nail olduq və hazırda bizim yalnız yerli kadrlardan ibarət çox uğurlu və bacarıqlı peşəkarlar komandamız var. 2018-2020-ci illəri əhatə edən inkişaf strategiyamızda ümumi məqsəd müştəri əməliyyatlarının 90%-dən çoxunu onlayn və özünəxidmət kanallarına keçirməkdir. Burada söhbət yalnız pul köçürmələrindən deyil, eləcə də müştərinin bank vasitəsilə həyata keçirdiyi digər çeşidli maliyyə xidmətlərindən (məs: hesab açmaq, kart sifarişi, kredit verilməsi və s.) gedir. İlk olaraq əsas hədəfimiz hüquqi şəxslər və fərdi sahibkarların çeşidli maliyyə xidmətlərinə daha çevik və sadə üsulla çıxışını təmin etməyə yönəlib. Hazırda onların əməliyyatlarının 83%-i onlayn və özünəxidmət kanalları vasitəsilə həyata keçirilir, lakin yalnız pul köçürmələri üzrə əməliyyatlara nəzər salsaq, bu əməliyyatların 95-97%-i onlayn aparılır.

Hazırda bizim bazara təqdim etdiyimiz həllərdə vacib olan amil odur ki, bu həllərin yaranmasında müştərilərimiz aktiv olaraq iştirak edirlər, öz rəy və təkliflərini bizimlə bölüşürlər.

- PAŞA Bank hal-hazırda məsafədən xidmət kanalları vasitəsilə hansı məhsul və xidmətləri təklif edir?

- İlk olaraq qeyd edim ki, biz keçən ilin sonu hüquqi şəxs və fərdi sahibkarlar üçün tam yeni Onlayn Bank xidmətini istifadəyə vermişik və bu platformanın imkanlarını daima genişləndiririk və inkişaf etdiririk. Məqsədimiz müştərilərə yüksək səviyyəli bank və maliyyə xidmətləri təcrübəsini yaşatmaqdır.

İlin əvvəlində biz "Elektron hökumət" və B.EST Solutions-la əməkdaşlıq çərçivəsində hüquqi şəxs və fərdi sahibkarlar üçün banka gəlmədən müştəri olmaq və onlayn hesab açmaq imkanını təqdim etdik. Bu vasitə ilə müştərilərin hazırda açdığı hesabların 85-87%-i onlayn şəkildə həyata keçirilir.

Bundan əlavə əməkhaqqı kartlarının onlayn sifarişi mümkündür. Əgər müştərimiz öz əməkdaşlarına əməkhaqqı kartı sifariş edirsə o, bu əməliyyatı banka gəlmədən edir. Açılan əməkhaqqı kartlarının 60%-dən çoxu onlayn açılır və bu proses bir neçə dəqiqə ərzində həyata keçirilir.

Bundan başqa kredit ödənişləri və POS-terminal sifarişini də müştərilər artıq Onlayn Bank sistemindən həll edirlər. Qeyd edim ki, POS-terminal sifarişi bir neçə gündür ki, istifadəyə verilib və artıq artan sifarişlərin şahidi oluruq.

- Bütün bank xidmətlərinin əsasını təşkil edən onlayn hesab açmaq imkanı xüsusilə vurğulanmalıdır. Bankın filiallarına gəlməsinə artıq ehtiyacı olmayan yeni müştərilər üçün vaxta qənaətlə bağlı hansı proqnozlarınız var?

- Gəlin ilk öncə əvvəlki vaxtlarda göstərilən xidmətlərə nəzər salaq. Müştəri banka gəlirdi, yola vaxt sərf edirdi, bəzi hallarda avtomobil dayanacağı ilə bağlı problemlər yaşayırdı və bu kimi başqa çətinliklərlə üzləşirdi. Ancaq indi həmin məsələlər aradan qaldırılıb və sahibkar öz işinin başında, ofisində ya da ailəsinin yanında hesab aça bilər.

- PAŞA Bank müştərilər üçün “rəqəmsal” xidmətlərə keçid istiqamətində hansı tədbirləri görür? Yeni məhsul və xidmətlərin hazırlanması zamanı cari və potensial müştərilərinizlə nə dərəcədə sıx ünsiyyətdə olursunuz?

- Biz hər hansı bir rəqəmsal məhsulu yaratmağa başlamazdan əvvəl müştərilərlə görüşürük və onların ehtiyaclarını öyrənirik. Yeni həllin onların qarşılaşdıqları çətinlikləri həll edəcəyinə, onların işinə dəyər qatacağına əmin olduqdan sonra məhsulun yaradılmasına başlayırıq. Qeyd etməliyəm ki, bu görüşlərdə və fokus qruplarımızda müştərilər çox aktiv iştirak edirlər və öz rəylərini verirlər. Əlbəttə, bu, çox sevindirici haldır və biz onlara artıq müştəri kimi yox, biznes partnyorumuz kimi yanaşırıq.

Qeyd edim ki, hər hansı bir məhsulun yeni funksiyası işlək vəziyyətə gəldikdə biz müştərilərlə məhsul nümayişi görüşləri keçiririk və hazır həlli təqdim edərək onların fikirlərini öyrənirik.

- Söhbətimizə yekun vuraraq öyrənmək istərdik ki, tamamilə “rəqəmsal” xidmətlərə keçən və PAŞA Bankın təklif etdiyi rəqəmsal məhsul və xidmətlərdən fəal şəkildə istifadə edən müştərilər hansı rəqabət üstünlükləri əldə edirlər?

- Tam rəqəmsal həllərdən yararlanan müştərilər qeyd etdiyim kimi öz vaxtlarını çox səmərəli istifadə edə bilirlər. Belə ki, bugünkü dinamik həyatımızda hər bir saniyə çox vacibdir və insanlar istəyirlər ki, ehtiyaclarına uyğun, keyfiyyətli məhsulları əlavə vaxt sərf etmədən, rahatlıqla əldə etsinlər. Biz də bu gün müştərilərimizin bu ehtiyaclarını təmin edərək onların məmnuniyyətinə nail olmağı əsas hədəfimiz hesab edirik. Onu da qeyd edim ki, istifadəyə verdiyimiz rəqəmsal həllər üzrə ortalama məmnunluq səviyyəsi müştərilərimiz tərəfindən 10 ballıq sistemlə 9 baldan yuxarı qiymətləndirilib və bu nəticə bizim düzgün istiqamətdə irəliləməyimizin bir göstəricisidir.

- Təşəkkür edirəm!

Trend-in ən mühüm və maraqlı xəbərlərini "Telegram"da izləyin