Sülhməramlıların Qarabağdan çıxması... - Rusiyanın iki məqsədi

Tarix: 6 Oktyabr 2023 15:36

Rusiya da buna görə Paşinyanı günahlandıracaq

Sonxeber.net xəbər verir ki, bu sözləri siyasi şərhçi Asif Nərimanlı Rusiya Müdafiə Nazirliyinin nümayəndə heyətinin bu gün İrəvana getməsi ilə bağlı xəbərə münasibət bildirərkən deyib.

"Rusiyanın sülhməramlı kontingentinin Qarabağdan çıxarılmasının vaxtını Ermənistanla müzakirə etməsinin heç bir məntiqi izahı yoxdur. Əgər informasiya doğrudursa, burada Rusiyanın iki mümkün məqsədi ola bilər.

Birincisi, Moskva İrəvandan Ermənistana gedən ermənilərin müəyyən hissəsinin Qarabağa qayıtmasını təmin etməsini istəyə bilər: Xankəndidə qalan ermənilərin sayı sülhməramlıların bölgədə qalıb-qalmamasının Bakı ilə müzakirəsinə belə bəs etmir, ruslar sayı artırıb danışıqlara gəlmək istəyir; son proseslərdən sonra ermənilərin ruslara inamı qalmadığı üçün onları buna yalnız İrəvanın inandırması mümkündür;

İkincisi, Moskva sülhməramlılarını bölgədən çıxarmamışdan öncə buna görə günahı Paşinyan hakimiyyətinin üzərinə yıxmaq, çıxdıqdan sonra "Ermənistan edə bilərdi, amma etmədi" deyə bilmək üçün bu informasiyanı dövriyyəyə buraxıb;

İrəvan artıq bu informasiyanı təkzib etdi, çünki bunun qəbul edilməsi sülh danışıqlarını arxa plana atır, Ermənistanı ittiham altına salır və Paşinyanın hazırda sığındığı Qərb tərəfdaşlarını oyundan kənarlaşdırır. İmtina etməsi Bakının sülhməramlıları daha tez çıxarmaq imkanını artıran məqamdır, Rusiya da buna görə Paşinyanı günahlandıracaq.