Bu ölkə portağal qıtlığı ilə üzləşə bilər

Tarix: 20 Yanvar 2024 15:12

Dəyişkən hava şəraiti və infeksiya xəstəlikləri portağalın İsveçdə qıt məhsula çevrilməsinə səbəb ola bilər.

Sonxeber.net publika.az-a istinadən xəbər verir ki, ölkədə satılan bütün şirələrin demək olar, yarısı portağaldan hazırlanır, xəstəlik düşmüş meyvələrə qarşı preparat isə hələ də yoxdur.

"Bu vəziyyət ölkədə portağalın əlçatanlığına və qiymətinə təsir edəcək. Sənayedə, ümumiyyətlə, hər zaman rahatlıqla əldə edə bildiyimiz şirələr üçün xammalın təxminən 25 faizi çatışmır. Bunun səbəbi, portağalın yetişdiyi ölkələrin bir çoxunda mövcud olan həddindən artıq dəyişkən hava şərtlərinin ölkəmizdə üzləşdiyimiz yoluxucu xəstəlik səbəbindən daha da ağırlaşması ilə əlaqədardır" - deyə, meyvə şirələrinin istehsalı üzrə ixtisaslaşmış "Eckes-Granini" şirkətinin baş direktoru, İsveç Meyvə Şirələri Assosiasiyaları Ticarət Təşkilatının sədri Maqnus Berndtsson bildirib.

Sitrus meyvələrinin yaşıllaşması və ya "sarı əjdaha xəstəliyi" müxtəlif həşəratlar tərəfindən yayılır və hazırda onun müalicə üsulu yoxdur, lakin bu istiqamətdə araşdırmalar davam edir. İnfeksiya ağacın özünə təsir edir, meyvələr yaşıllaşır, deformasiyaya uğrayır, acı dad alır və beləliklə, xammal kimi yararsız hala gəlir.

Floridada portağal şirəsi istehsalı 2005-ci ildə orada xəstəlik aşkar edildikdən sonra 70 faiz azalıb.

"Avropanın meyvə şirəsi konsentratının çox hissəsini satın aldığı Braziliyada da infeksiya artmaqdadır. Bu xəstəliyin qısamüddətli həlli yoxdur, görülməsi mümkün olan yeganə tədbir ağacları kəsmək və yenilərini əkməkdir", - Maqnus Berndtsson vurğulayıb.