Hindistanda fermerlər altı ay davam edəcək etiraz aksiyaları keçirəcək

Tarix: 13 Fevral 2024 21:52

Hindistanda narazı fermerlər ölkənin paytaxtı Nyu Dehlidə altı ay davam edəcək etiraz aksiyasına hazırlaşıblar.

Sonxeber.net report.az-a istinadən xəbər verir ki, bu barədə "India Today" portalı kəşfiyyat xidmətlərinin hesabatına istinadən məlumat yayıb.

Fermerlərin aksiyasına təkcə Pəncabdan 1500 traktor və 500 maşın səfərbər edilib. Bu maşınlara altı aylıq ərzaq, yemək və maddi-texniki təchizat yüklənib.

Çərşənbə axşamı günü təhlükəsizlik qüvvələri etiraz edən fermerlərin traktorlarını Yeni Dehliyə sürməsinə mane olublar.

Polis Yeni Dehlidə əsas magistral yollar boyunca əvvəlcədən quraşdırılmış maneələri keçməyə çalışan insanlara qarşı su şırnaqları və gözyaşardıcı qazdan istifadə edib.

Axşam saatlarında aksiyanın təşkilatçıları hücumu dayandırmaq qərarına gəliblər, lakin səhər qayıdacaqlarına söz veriblər.

Hindistanın mərkəzi Pəncab, Haryana və Uttar Pradeş ştatlarında fermerlər hökumətdən gələcək məhsullar üçün onlara minimum dəstək qiymət zəmanəti verəcək qanunun qəbulunu tələb edərək etiraz aksiyası keçiriblər.

Bundan əlavə, fermerlər onlara pensiya verilməsini, təsərrüfatların borcdan azad edilməsini , Hindistanın Ümumdünya Ticarət Təşkilatından (ÜTT) çıxmasını və bütün azad ticarət müqavilələrini dondurmasını istəyirlər. Bu ştatlardan 200 fermer ittifaqı yürüşdə iştirakını elan edib.