''Hazırkı millidə məni nəzərə almırlar. Niyə?'' - ''Keşlə''nin oyunçusu

Tarix: 6 Dekabr 2019 22:48

"Keşlə"nin futbolçusu Stanislav Namaşko Azərbaycan Premyer Liqasının 14-cü turunda səfərdə "Qarabağ"la 2:2 hesablı heç-heçə etdikləri matçdan sonra Qol.az-ın da müxbirinin iştirak etdiyi brifinqdə jurnalistlərin suallarını cavablandırıb.

- Biz oyundan əvvəl bilirdik ki, hansı komanda ilə oynayacağıq və çətin olacaq. 1 xal qazandığımız üçün təbii ki, sevinirik. Oyuna 3 xal üçün kökləndiyimizi gizlətmirəm. Amma 1 xal da yaxşı nəticədir. Həm qalib gələ bilərdik, həm də uduza bilərdik.

- Bəzi aparıcı oyunçularınız matçda yox idi. Necə düşünürsünüz, onlar meydanda olsaydı, "Keşlə"  qələbə ilə ayrıla bilərdi?

- Nəsə demək çətindir. Bu gün onların əvəzinə meydana çıxan oyunçular özlərini yaxşı tərəfdən göstərdilər. 1 xal qazandığımza görə şadıq. "Qarabağ"la qarşılaşdığımızı yaxşı başa düşürdük.

- İkinci qolu buraxanda  etiraz edirdiniz. Hətta, hakimin yanına da getdiniz. Topun qapı xəttini keçmədiyini düşünürdünüz?

- Mən hakimə etiraz etmədim. Sadəcə həmin an əmin idim ki, top qapı xəttini keçməmişdi. Bunu hakimə bildirdim. Sonra mənə dedilər ki, top xəttini keçmişdi. Buna görə də ikinci hissə başlayanda hakimdən üzr istədim. Adətən, belə şeyləri özümə sığışdırmıram. Hakimlərə heç vaxt yaxınlaşıb,  etirazımı bildirmirəm. Amma həmin vaxt emosiyalara qapılmışdım.

- Qarşıda "Qarabağ"la kubok oyunlarında 2 dəfə qarşılaşacaqsınız. Ümumiyyətlə, eyni rəqiblə qısa vaxt ərzində bu qədər oynamaq darıxdırıcı olmur?

- Əlbəttə, olur. Daha fərqli komandalarla qarşılaşmaq istəyərdik. Çempionat belədir ki, əlimizdə olanla kifayətlənməliyik. "Qarabağ", "Neftçi" kimi komandalarla oynamaq həm bizim, həm də gənc futbolçular üçün  motivasiyadır.

- "Keşlə" mövsümün ilk hissəsini 2 və ya 3-cü pillədə başa vuracaq. Bu nəticə komandanı qane edirmi?

- Çempionat bizim üçün çətindir. Çünki hələ mayın sonuna qədər çox vaxt var. Amma bizim mövsüm başlamamışdan əvvəl qarşımıza qoyulan məqsəd ilk 3-lüyə düşməkdir. Hər bir matça xal toplamaq üçün çıxırıq. Nə qədər alınacaq, bunu ancaq may ayında deyə bilərik. İndidən nə isə demək bir az çətindir. Bəlkə də yığdığımız xal bizi qane edir. Bir az çox da ola bilərdi, az da. Amma hal-hazırki mövqeyimiz bizi tamamilə qane edir. Bu gün avrokuboklara vəsiqə vermirlər. Bizə lazım olan may ayına qədər nə qədər xal toplayacağımız, çempionatı neçənci yerdə  başa vuracağımızdır.

- Moldova yığmasında baş məşqçi dəyişikliyi olub, bu vəzifəyə türkiyəli mütəxəssis gətirilib.  Yenidən milliyə qayıdışın baş tuta bilər?

- Məndə olan məlumata görə, bu gün mənim namizədləyim yoxdur. Hazırkı millidə məni nəzərə almırlar. Niyə? Bunu onlara sual versəniz daha yaxşı olar. Hər halda yeni baş məşqçi var,  qərarları da o verir.