Hakimləri təhqir edən klub prezidentinə ağır CƏZA, “Sabah”ın məşqçisinə isə... - FOTO

Tarix: 3 Aprel 2025 14:38

AFFA İntizam Komitəsi 2-ci liqada mübarizə aparan "Hypers Quba"nın prezidenti Ayaz Abdullayevi, məşqçisi Rəsul Babazadəni, futbolçuları Baxşəli Baxşəliyev və Xaqan Məmmədovu cəzalandırıb.

Sonxeber.net xəbər verir ki, qurumun bugünkü iclasında belə qərar qəbul edilib. 

Qərarda qeyd edilib, 2-ci liqanın 19-cu turunun "Ağdaş"la oyunu bitdikdən sonra "Hypers Quba"nın prezidenti Ayaz Abdullayev hakimi təhqir etdiyinə görə 3 oyun şərti olmaqla 5 oyunluq cəzalandırılıb."Hypers Quba" 400 manat cərimələnib. Sınaq müddəti 3 ay təyin edilib.

Həmçinin eyni görüş başa çatdıqdan sonra "Hypers Quba"nın məşqçisi Rəsul Babazadə meydana daxil olaraq hakimi hədələyib. O, bu səbəbdən 2 oyun cəzalandırılıb. Klub isə 100 manat cərimə edilib.

Bundan əlavə, həmin oyunda "Hypers Quba"nın futbolçularından Baxşəli Baxşəliyev ciddi qayda pozuntusuna görə birbaşa qırmızı vərəqə aldığı üçün 2 oyunluq, Xaqan Məmmədov isə ikinci sarıdan qırmızı vərəqə aldığı üçün 1 matçlıq cəzalandırılıb.

Qeyd edək ki, "Haypers Quba" - "Ağdaş" görüşü 3:3 hesabı ilə yekunlaşıb.

xxx

AFFA İntizam Komitəsi Azərbaycan Kubokunun yarımfinal mərhələsinin ilk oyunları barədə qərarlarını açıqlayıb.

"Qarabağ"la oyunda 4 futbolçusu sarı vərəqə alan "Araz-Naxçıvan" 700 manat cərimələnib.

"Sabah"la görüşdə azarkeşləri tərəfindən pirotexniki vasitədən istifadə edildiyinə görə, "Neftçi" 1500 manat ziyana düşüb. Qarşılaşmanın 90+3-cü dəqiqəsində "Sabah"ın məşqçisi Aleksey Antonyuk hakimləri təhqir etdiyinə görə birbaşa qırmızı vərəqə alıb. Bu üzdən o, 3 oyun şərti olmaqla 5 matçlıq cəzalanıb, klubu 4000 manat cərimə edilib. Sınaq müddəti 3 ay təyin olunub.