Bolqarıstan Azərbaycan qazının nəqlini nəzərdə tutan interkonnektorun tikintisini ilin sonunadək başa çatdırmağı planlaşdırır

Tarix: 6 Yanvar 2020 10:28

Azərbaycan qazının Bolqarıstana nəqlini nəzərdə tutan Yunanıstan-Bolqarıstan interkonnektorunun (IGB) tikintisi 2020-ci ilin sonunadək başa çatacaq.

Sonxeber.net Trend-ə istinadən xəbər verir ki, bunu Bolqarıstanın Energetika naziri Temenujka Petkova deyib.

Nazir bildirib ki, bununla da "Bulgargaz" şirkəti ilə SOCAR arasında "Şahdəniz" yatağından Bolqarıstana bir milyard kubmetr qazın tədarükü ilə bağlı saziş icra olunacaq:

"Biz Yunanıstanla interkonnektorun tikintisini başa çatdırmalıyıq ki, 2020-cilin sonundan Xəzər regionundan həmin həcmdə qazı əldə edə bilək".

Qeyd edək ki, IGB Trans-Adriatik boru kəməri ilə birləşdiriləcək.

Xatırladaq ki, 2013-cü ilin sentyabrında "Bulgargaz EAD" "Şahdəniz-2" çərçivəsində ildə 1 milyard kubmetr qazın alınması ilə bağlı 25 illik saziş imzalayıb. Azərbaycan təbii qazı "Trans-Adriatik" (TAP) qaz boru kəməri ilə 2020-ci ildə Avropaya çatdırılacaq. Həmin il Yunanıstan-Bolqarıstan qaz şəbəkələrinin bir-biri ilə əlaqələndirilməsi planlaşdırılır. Bolqarıstan interkonnektor ilə 2020-ci ildən etibarən ildə 1 milyard kubmetr Azərbaycan qazı alacaq. Azərbaycan qazı Bolqarıstanın istehlakının dörddəbir hissəsini ödəyəcək.

IGB layihəsinin dəyəri təxminən 220 milyon avro qiymətləndirilir. Boru kəməri Şimal-Şərqi Yunanıstanın Komotini və Bolqarıstanın cənubundakı Stara Zagora bölgələrini bir-birinə birləşdirəcək. IGB qaz boru kəmərinin Komoti və Stara Zagorada çıxış nöqtəsi olacaq, Yunanıstan və Bolqarıstan milli təbii qaz sistemləri arasında birbaşa əlaqə yaradılacaq. 182 kilometrlik IGB boru kəməri Yunanıstandan Bolqarıstana ildə təxminən 3 milyard kubmetr təbii qaz nəqli qabiliyyətinə malik olacaq və gələcək bazar tələbatına əsasən bu həcmin illik 5 milyard kubmetrə çatdırılması imkanı var.