Beynəlxalq Muğam Mərkəzinin təşkilatçılığı ilə “Şifahi ənənəli Azərbaycan musiqisi” (I və II cildlər) kitabının təqdimatı keçirilib - FOTO

Tarix: 19 Yanvar 2020 14:09

Yanvarın 16-da  Beynəlxalq Muğam Mərkəzinin təşkilatçılığı ilə AMEA Folklor İnstitutunun Şifahi ənənəli Azərbaycan musiqisi" (I və II cildlər) kitabının təqdimatı olub.

Tədbiri giriş sözü ilə AMEA Folklor İnstitutunun direktoru, akademik Muxtar  İmanov  açaraq kitabın əhəmiyyətindən söz açıb. Bildirib ki,  şifahi ənənəli Azərbaycan musiqisi və rəqslərinə həsr olunmuş bu kitabda toplanan nümunələr təkcə Şimali Azərbaycan ərazisi ilə məhdudlaşmır: "Çalışmışıq ki, kitaba daxil edilən unudulmuş nümunələr - xalq sənəti və mədəniyyət nümunələri həm də Cənubi Azərbaycan, Dağıstan, hətta İraq türkmənlərının yaşadıqları müxtəlif  coğrafiyalardan olsun.  Nəticədə unudulmuş xalq musiqisi və rəqslərinin toplandığı belə bir dəyərli kitab işıq üzü görüb.

"Şifahi ənənəli Azərbaycan musiqisi" kitabının I cildi "Təsniflər və mahnılar",  II cildi  isə "Rəqslər" adlanır. Direktor həmçinin diqqətə çatdırıb ki, Folklor İnstitutunun Mədəniyyət Nazirliyi, Aşiqlar Birliyi ilə yaxın əlaqələri var. Habelə son illər Beynəlxalq Muğam Mərkəzi ilə sıx əlaqələrimizi xüsusi olaraq qeyd etmək istəyirəm.  Beynəlxalq Muğam Mərkəzi ilə birgə müntəzəm olaraq bir çox silsilə tədbirləri keçirərək bu əlaqələrin daha da möhkəmləndirilməsinə nail olduq. Bundan məmnunluq hissi duyuruq. Folklor İnstitutunun kollektivi adından bu əlaqələrin möhkəmlənməsində mühüm rolu olan Beynəlxalq Muğam Mərkəzinin direktoru, Xalq artisti Murad Hüseynova təşəkkürümü bildirirəm.

Folklor İnsitutunun "Musiqi folkloru" şöbəsinin müdiri Nailə Rəhimbəyli çıxış edərək bildirib ki,  Azərbaycan xalq musiqisinin toplanılması və nota salınması son dövrlərdə aktual bir məsələ kimi hər zaman diqqət mərkəzində olub. Bu gün biz xalq musiqisinə, muğama göstərilən dövlət qayğısını, xüsusilə Azərbaycan Respublikasının Birinci vitse-prezidenti  Mehriban Əliyevanın diqqətini həmişə hiss edirik.  Məhz bu diqqət və qayğıya görə N.Rəhimbəyli dövlət başçısı İlham Əliyevə və Birinci vitse-prezidenti  Mehriban Əliyevaya minnətdarlığını bildirib.

Kitabın materiallarını toplayan və nota köçürən A.Zeynallı adına Musiqi Kollecinin müəllimi, tarzən Mehman Mikayılov bildirib ki, materialları 35 illik karyerası ərzində  Türkiyə, İran İslam Respublikası, Hindistan, Türkmənistan, İraq (Kərkük) və digər ölkələrdə qastrol səfərlərdə olarkən toplayıb.

Tədbirdə  Mehman Mikayılovun bədii rəhbərliyi ilə  "Milli Şərq" ansamblının müşayiətində Əməkdar artist Nuriyyə Hüseynova, Xalq artistləri  Gülyaz Məmmədova , Gülyanaq Məmmədova, Muğam müsabiqəsinin laureatı Xəyalə Qafarzadə, ustad xanəndə Sabir Abdullayev, Əməkdar artist Ruzə İbişovanın ifaları təqdim olunub,  həmçinin Bakı Xoreoqrafiya Akademiyasının tələbələrinin ifasında "Alçagülü", "Çəməni", "Məxməri" rəqsləri və "Zəngilan" yallısı da təqdim olunub.