Apple Hindistan bazarına girir

Tarix: 8 Mart 2020 22:52

Apple-ın baş direktoru Timoti Kuk dünyanın ən böyük ikinci ölkəsi Hindistanda real və onlayn satış mərkəzi açacaqlarını elan edib.

Sonxeber.net ted.az-a istinadən bildirir ki, T.Kuk onlayn mağazanın il ərzində fəaliyyətə başlayacağını, real satış mərkəzinin açılışının isə gələn ilə planlaşdırıldığını deyib.

Hazırda şirkət məhsullarını üçüncü partiya satış mağazaları vasitəsilə satır. Ancaq satış göstəricilərinə görə, Samsung və Huawei-dən geri qalır.

T.Kuk toplantıda, eyni zamanda dünyanın bir çox ölkəsinə yayılan koronavirus haqqındakı narahatlıqlara da aydınlıq gətirib.

Apple məhsulları üçün detal istehsal edən əksər Çin fabriki epidemiyadan dolayı bağlanıb, yaxu tam gücü ilə işləmir. T.Kuk bu faktorlara görə, sərmayəçilərə şirkətin ilk rübdəki qazanc hədəfinə çatmayacağını izah edib.

Qeyd edək ki, Hindistan sadəcə dünyanın ən böyük ikinci ölkəsi deyil, eyni zamanda ən böyük ikinci "ağıllı" telefon bazarına sahibdir. Texnologiya nəhənginin Hindistanda indiyədək satış mərkəzi qurmaması isə bu ölkədəki qanunlarla bağlıdır.

Belə ki, Hindistan 2018-ci ildə xarici firmaların yerli ortaq olmadan satış mağazası açmasını qadağan edən qanun qəbul edib. Ona görə də Apple rəsmiləri uzun müddətdir, hökumətdən icazə almağa çalışırdılar.