Huawei daha bir ölkədə sıxışdırıldı - Şirkət işçilərin 70%-ni ixtisar edəcək

Tarix: 30 Iyul 2020 20:12

Gəlir proqnozu iki dəfə azalıb.

Huawei Technologies şirkəti son zamanlar dünyanın ən böyük bazarlarından olan Hindistan bazarından sıxışdırılır. Şirkətin illik gəlir proqnozu kəskin şəkildə azalıb. Kompaniya Hindistandakı işçilərinin yarıdan çoxunu işdən çıxarmağı planlaşdırır.

Sonxeber.net ted.az-a istinadən bildirir ki, bu hadisələr Hindistan və Çin arasındakı münaqişə nəticəsində Hindistan bazarında artan anti-Çin əhval-ruhiyyəsi fonunda baş verir.

Hindistan hökuməti artıq telekommunikasiya şirkətlərinə Çin əvəzinə yerli 4G avadanlıqlarını istifadə etmələrini istəyib.

Hazırda Huawei 2020-ci ildə Hindistan bazarından 350-500 milyon dollar gəlir əldə edəcəyini gözləyir. Qeyd edək ki, şirkət əvvəllər təxminən 700-800 milyon dollar qazanmağı planlaşdırmışdı. Həmçinin şirkətin işçilərinin 60-70% ixtisar edəcəyi bildirilir. İşdən çıxarma tədqiqat və inkişaf istiqamətində işləyən insanlara, eləcə də qlobal xidmət mərkəzində işləyən insanlara təsir etməyəcək.

Xatırladaq ki, artan gərginliklər içərisində Hindistan hökuməti populyar sosial media platforması TikTok da daxil olmaqla, 59 Çin proqramını ölkəsində qadağan edib. Çin bu addıma Dünya Ticarət Təşkilatının siyasətinə zidd olduğunu söyləyərək cavab verib.