“Android” sistemli planşetlər üçün yeni rejim təqdim edilib

Tarix: 3 Sentyabr 2020 08:16

"Google" şirkəti "Android" əməliyyat sisteminin idarəetməsi ilə işləyən planşetlər üçün yeni "Kids Space" rejimini təqdim edib.
 
Sonxeber.net ictnews.az-a istinadən bildirir ki, "Kids Space" kontentdən rahat istifadəyə imkan verən sadələşdirilmiş xüsusi uşaq interfeysidir. Şirkət nümayəndələrinin sözlərinə görə, rejimin məqsədi uşaqlara sevdikləri əşyaların tədqiqində kömək etməkdir. Uşağa maraq sahələrinin seçilməsi təklif olunduqdan sonra interfeys oxumaq, izləmək, oyun oynamaq və s. üçün materialları göstərir. Rejimi istifadəçiyə uyğun tənzimləyərək onun avatar personajını yaratmaq mümkündür.
 
ABŞ-da "Kids Space" üçün 400-dən çox kitab pulsuz təklif olunur. Bundan başqa, yaradıcılıq və inkişaf üçün "YouTube Kids" videoçarxlarından istifadə edilir. Bütün materiallar "Oynamaq", "Oxumaq, "Baxmaq", "Etmək", tab-vərəqələrinə bölünür. Valideynlər kontenti uşağın yaşına görə çeşidləyə, "Google Play" mağazasından əlavə kontent yükləyə, eləcə də "Family Link" proqramı vasitəsilə vaxt məhdudiyyətləri qoya və s. edə bilərlər. Qeyd edək ki, bu rejimdə "Google Assistant" səsli köməkçi funksiyası işləmir.
 
"Kids Space" rejimi ilə təchiz edilən ilk planşetlər ikinci nəsil yeni "Lenovo Tab M10" modelləri olacaq. Gələcəkdə digər "Android" sistemli planşetlərin əhatə olunması nəzərdə tutulur.