''Azərbaycan Ordusunun qalibiyyət yürüşü məntiqi sonluğuna çatmadan dayanmayacaq''

Tarix: 20 Oktyabr 2020 16:54

"Bu gün Prezident İlham Əliyev Dağlıq Qarabağ probleminin həlli konteksində Azərbaycan cəmiyyəti ilə münasibətlərdə əvvəlki dövrlərdən köklü şəkildə fərqli, çox perspektivli və daha möhkəm mövqedədir".

Bunu Sonxeber.net-a açıqlamasında "Bakı xəbər" qəzetinin baş redaktoru, media eksperti Aydın Quliyev deyib.

Ekspert bildirib ki, bu gün Cənubi Qafqazda proseslərin taleyini Azərbaycan cəmiyyəti, Azərbaycan ordusu və Azərbaycan Prezidentindən ibarət olan bir-birinə bağlı, möhkəm bir üçlük həll edir:

"Prezident bir tərəfdən Dağlıq Qarabağda uğurlu hərbi əməliyyatların aparılmasına birbaşa Ali Baş Komandan kimi rəhbərlik edir, həm döyüş meydanlarında aparılan hərbi əməliyyatlara ölkə daxilində ideoloji müdafiə qurmaq və onun xarici siyasətdə diplomatik müdafiəsini təşkil etmək sahəsində fəaliyyət göstərir, həm də Azərbaycan cəmiyyətini apardığı əməliyyatın uğurlu nəticələri ilə bağlı çox etibarlı məlumatlandırmaq mexanizmini qurmaqla cəmiyyətimizlə ordumuz arasında bağlılığı və əlaqəni daha da möhkəmləndirir. Bu gün Cənubi Qafqazda proseslərin taleyini Azərbaycan cəmiyyəti, Azərbaycan ordusu və Azərbaycan Prezidentindən ibarət olan bir-birinə möhkəm bağlı bir üçlüyün həll etdiyini desək, qəti şəkildə yanılmarıq.

Azərbaycan Prezidentinin tvitləri qədər populyar tvitə rast gəlmərik

Artıq Qarabağ bölgəsində ərazilərimizin dalbadal işğaldan azad olunmasıyla bağlı xəbərləri almaq Azərbaycanda informasiya məkanı üçün bir ənənəyə çevrilir. Bu gün Cənubi Qafqazın və dünyanın informasiya məkanında Azərbaycan Prezidentinin tvitləri qədər populyar tvitə rast gəlmərik. Çünki bu tvitlər həm Azərbaycan xalqının qələbə müjdəsi gözlədiyi xəbərlərdir, həm də regionumuzda müharibə təhlükəsini daha sürətlə aradan qaldıran və regionumuzu daha möhkəm sülhə doğru aparan bir məfhuma malik tvitlərdir. Ona görə, bu gün Avrasiyanın informasiya məkanında Azərbaycan Prezidentinin tvitləri qədər populyar olan ikinci tvitə rast gəlmərik. Bu da təbii bir şeydir.

Artıq proses yekunlaşmaq üzrədir

Artıq Azərbaycan Ordusunun qalibiyyət yürüşü elə bir qarşısıalınmaz forma alıb ki, özünün məntiqi sonluğuna çatmadan təbii ki, dayanmayacaq və dayana bilməz. Söhbət Ermənistanın Dağlıq Qarabağın ətrafında 30 ildən bəri yaratdığı və dünyanı aldatmağa çalışdığı təhlükəsizlik qövsü deyilən uydurma, əsassız olan bir xəttin yarılmağından və Azərbaycanın tarixi torpaqları sayılan 7 rayonun azad olunmasından gedir. Artıq proses yekunlaşmaq üzrədir. Yəqin ki, yaxın günlərdə bu prosesin yekunlaşmağı ilə bağlı ölkə Prezidentinin yeni tvitləri olacaq. Azərbaycan Ordusunun əldə etdiyi uğurlar Azərbaycanı BMT-nin tanıdığı sərhədlər çərçivəsində ərazi bütövlüyünə və bütün regionumuzu isə möhkəm sülhə doğru aparır. Təbii ki, bu prosesin sonunda həm də Ermənistanın indikindən də böyük və ağrılı məğlubiyyəti dayanıb. Ermənistan dinc əhaliyə vurduğu ziyanların, dinc əhaliyə qarşı törətdiyi qətliamların layiqli qisasını həqiqətən də döyüş meydanlarında alır və Azərbaycanın işğaldan azad olunan hər bir kəndi, hər bir qəsəbəsi, hər bir küçəsi, hər bir daşı qətlə yetirilən azərbaycanlıların xatirəsinə ən böyük hörmətdir".

Təhməz Əsədov