''Bu hesabat Azərbaycanın mövqelərinin möhkəmləndiyini göstərir''

Tarix: 16 Dekabr 2020 15:27

"Bildiyiniz kimi, "Human Rights Watch" insan haqları təşkilatı dekabrın 15-də "Ermənistan Azərbaycana qarşı klaster bombalarından istifadə edib" adlı hesabat yayıb. Təşkilat onu da bildiririb ki, klaster sursatlardan istifadə müharibə qanunlarının pozulması deməkdir".

Bunu Sonxeber.net-a açıqlamasında Sosial Tədqiqatlar Mərkəzinin baş məsləhətçisi, politoloq İlyas Hüseynov deyib.

Politoloq bildirib ki, Ermənistanın Gəncəni iki dəfə qadağan olunmuş bombalardan atəşə tutması müharibə cinayəti olmaqla yanaşı, həm də insanlığa qarşı cinayətdir:

"44 günlük Vətən müharibəsi dövründə Ermənistan tərəfi beynəlxalq hüququ kobudcasına pozmaqla yanaşı, çoxsaylı müharibə cinayətlərinə imza atdı. Gecə saatlarında Azərbaycanın ikinci böyük şəhəri Gəncəyə iki dəfə qadağan olunmuş bombalardan istifadə olunması müharibə cinayəti olmaqla yanaşı, həm də insanlığa qarşı cinayət kimi dəyərləndirilir. Qeyd edək ki, Bərdəyə də analoji bomba atılmış və çoxsaylı dinc insan həlak olmuşdur. Xüsusilə vurğulamaq lazımdır ki, sözügedən şəhərlər müharibə ərazisindən çox uzaqdadır və burada heç bir hərbi hissə yoxdur. Bu onu göstərir ki, Ermənistan qəsdən yaşayış məntəqələrinə qadağan olunmuş bombalar atmaqla mülki əhali arasında panika və təşviş yaratmaq niyyəti güdüb". 

İ.Hüseynov deyib ki, "Human Rights Watch" insan haqları təşkilatının Ermənistanın müharibə cinayətlərinin yer aldığı hesabat yayması təqdir olunmalıdır:

"Hesabatda standart beynəlxalq nəşrlərə istinadla yazılır ki, Ermənistanın arsenalında "Toçka" və "İsgəndər" ballistik raketləri, "Smerç" və Çin istehsalı olan "WM-80" yaylım atəşi sistemləri var. O da qeyd olunur ki, Ermənistan və Dağlıq Qarabağdakı qüvvələr altı həftəlik müharibə dövründə Azərbaycanda sıx yaşayış məskənlərinə dəfələrlə klaster bombları atıb. Digər tərəfdən, Azərbaycanda olan beynəlxalq təşkilatların və diplomatik korpusun nümayəndələri Gəncəyə və Bərdəyə səfər etmişlər. Ermənistanın törətdiyi müharibə cinayətlərinin dünya ictimaiyyətinə çatdırılması məqsədilə dünyanın bir sıra aparıcı media orqanları hadisənin acı nəticələrini işıqlandırmışlar. Ölkəmizə qarşı hər zaman qərəzli mövqedə duran "Human Rights Watch" insan haqları təşkilatının Ermənistanın müharibə cinayətlərinin yer aldığı hesabat yayması təqdir olunmalıdır. Bu, eyni zamanda diplomatik-siyasi müstəvidə və informasiya müharibəsində Azərbaycanın mövqelərinin möhkəmləndiyinin göstəricisidir". 

Təhməz Əsədov