Azərbaycanlı müğənni Netflix-in döyüş filminə çəkilir - VİDEO

Tarix: 27 Dekabr 2020 13:18

Tanınmış müğənni Sevinc Ağaşirinova Amerikanın məşhur kino şirkəti Netflix-in kriminal aləmdən bəhs edən döyüş filmində çəkilir.

Sonxeber.net Sputnik Azərbaycan-a istinadən bildirir ki, o, studiya ilə artıq müqavilə imzalayıb. Filmin çəkilişləri də başlanıb. Müğənni etiraf edib ki, indiyədək müxtəlif filmlərdə epizodik rollarda çəkilib, ancaq indi ilk dəfə olaraq peşəkar aktrisa kimi rol oynayacaq.

Müqavilənin şərtlərinə görə, Ağaşirinova filmin təfərrüatını hələlik açıqlaya bilməz. Film Netflix-in saytında göstəriləcək. Ancaq premyeranın vaxtı hələ bəlli deyil.

Netflix - Amerikanın əyləncə şirkətidir, axın multimediası əsasında film və seriallarn tədarükçüsüdür. 1997-ci il avqustun 29-da Rid Hastinq və Mark Rendolf tərəfindən yaradılıb. Mənzil-qərargahı Kaliforniyada, Los-Qatosda yerləşir. Bu günlərdə şirkət Türkiyədə də studiya açıb.

Sevinc Ağaşirinova karyerasına aparıcı kimi başlayıb. O, "Xalq ulduzu" vokal müsabiqəsinin aparıcısı olub. Sonra isə müğənni olmaq istəyib. Ərə gedib oğul sahibi olandan sonra yaradıcılığında pauza vermək qərarına gəlib. İndi isə yenidən səhnəyə qayıtmaq fikrindədir, amma Türkiyədə.