''Azərbaycandakı radikal qüvvələr bu məsələdən narahatdırlar''

Tarix: 1 Fevral 2021 17:15

Məğlub etdiyimiz ermənilərlə eyni başlıqlar atırıq, sosial mediada eyni məzmunlu statuslar yazırıq, onlar da etiraz edir, biz də. Onlar da ittiham edir, biz də.

Bu cür vəziyyət kimlərə sərf edir? Cəmiyyətdə fikir ayrılığı, çaşqınlıq yaratmaq istəyənlər kimlərdir?

Bununla bağlı Ana Vətən Partiyasının sədr müavini Arzuman Abdulkərimov Sonxeber.net-a açıqlama verib:

"Azərbaycan çox ciddi qələbə əldə edib. Bunu bir çoxları gözləmirdilər. Özünü Prezidentə rəqib görənlər onun üstünə yeriyəndə deyirdilər ki, "Bu iqtidar Qarabağ məsələsini heç vaxt həll etməyəcək, bir qarış da olsun torpaq almayacaq". Bunların bir çoxunun istəkləri, arzuları gözlərində qaldı. Çünki 44 günlük müharibənin gedişində dövlət başçımızın bir çox beynəlxalq mediaya verdiyi müsahibələrdən bəlli oldu ki, 26 ilə, xüsusilə də İlham Əliyevin hakimiyyəti dövründə Qarabağ məsələsi bir an olsun belə diqqətdən kənar qalmayıb. Demək olar ki, dövlət başçısının bütün iş günü Dağlıq Qarabağ münaqişəsinin necə çözülməsi ilə bağlı müzakirələrdə keçib. Dövlət sirrləri deyilən bir məsələ var. Bu müharibədir, oyuncaq deyil. Dövlət də oyuncaq deyil. Dövlət idarəçiliyidir, burada elə məsələlər var ki, açılmır, deyilmir. 

10 Noyabr sənədləri imzalananda Azərbaycan və Rusiya Prezidentləri elan etdilər ki, Dağlıq Qarabağ problemi bitmişdir. Onda dedik ki, bu Zəfərə kölgə salmaq istəyən qüvvələr tapılacaqdır. Belələri həm daxildə var, həm xaricdə var. Bu qələbəni həzm edə bilməyən beynəlxalq güclər, maraqlı dövlətlər var, burada öz imperialist düşüncələrini həyata keçirmək istəyən dövlətlər var. Onların Azərbaycanda da dəstəkçiləri var. Bu həm müxalifətin içindədir, həm iqtisadırın içindədir. Bir neçə gün öncə bizim şəhidlərimizin aparılıb elə bir yerdə dəfn olunması və bunu edən məmurların bilərəkdənmi, bilməyərəkdənmi belə yanaşılması və haqlı olaraq şəhid ailələrimizin etirazına səbəb olması zəfərə kölgə salmaq istəyən qüvvələrimizin işinə yarıyırdı.

Ölkədə olan radikal müxalifət qüvvələri var, hansı ki, onlar birmənalı şəkildə 26-27 ili özlərinin siyasətini Qarabağ kartı üzərindən qururdular, iqtidara oradan yüklənirdilər. İndi onların əsasları kəsilib. Amma indi Qarabağda qalan bəzi nüanslar, incə məqamlar var ki, biz onlara diplomatik, iqtisadi, siyasi gücümüzü artırmaqla nail oluruq və yavaş-yavaş da o problemlərin həllinə doğru yaxınlaşırıq. Boğulan saman çöpündən yapışan kimi, daxildə olan bayaq sadaladığı beynəlxalq güclərə bağlı olan, onların qara maliyyələri ilə Azərbaycanda bu radikal qüvvələr, marginal qruplar, 5-ci kalonlar bu məsələdən narahatdırlar. İynənin ucu qədər yer axtarırlar ki, oradan qələbəmizə kölgə salsınlar. Deyim ki, müəyyən məqamlarda da buna nail ola bilirlər. Çünki bu qruplar aqressivdirlər. Bu qrupların 30 illik apardıqları anti-təbliğat kampaniyası 44 günün içində puça çıxdı, darmadağın edildi".

Təhməz Əsədov