Yeni müharibənin İrəvan vaxtı... - Paşinyan Rusiyaya arxayın olmaq istəyir

Tarix: 10 Aprel 2021 10:00

Nikol Paşinyan və Qarabağ klanını yaradanlardan olan Robert Köçəryan arasındakı şəxsi münasibətlərdəki gərginliyin seçkilərə də siraət edəcəyi əvvəlcədən məlum idi. Onların hər ikisi bu dövlətin kimin vassalı olduğunu yaxşı bilirlər.

Köçəryan seçkiqabağı kampaniyaya Moskvadan başladı. Amma bu səfəri onun planı üzrə baş verdiyini demək olmaz. Aydın idi ki, Putinlə və Rusiyadakı havadarları ilə görüşmək üçün Paşinyandan öncə Moskvaya səfər edən Köçəryanın məqsədləri daha böyük idi. Amma hadisələrin gedişi göstərdi ki, rəsmi Kreml daha ehtiyyatlı mövqe sərgiləməyə başlayıb. Belə ki, erməni mətbuatında Köçəryanın videokonfrans vasitəsi ilə Putinlə görüş keçirdiyi barədə məlumat yayılsa da, Kremlin sözçüsü Dmitri Peskov Putinin Ermənistanın eks prezidenti ilə yalnız telefon danışığının baş tutduğunu açıqlayıb.

Hazırki vəziyyət onu düşünməyə əsas verir ki, Rusiya Paşinyanın parlament seçkilərində növbəti dəfə qələbə qazanmasından yanadır. Buna Azərbaycan Prezidentinin çıxışları da müəyyən mənada öz təsirini göstərdi deyə bilərik. Prezident İlham Əliyevin Köçəryan və Sarkisyan cütlüyü ilə bağlı son çıxışlarında tez-tez işlətdiyi "Biz Köçəryan, Sarkisyan ordusunu məhv etdik. Onlar Azərbaycan xalqının düşmənləridir" bəyanatları Kremli rəsmi Bakının mövqeyini götür-qoy etməsinə səbəb oldu. Prezident İlham Əliyevin bu bəyanatlarını Kremlə verilmiş mesaj kimi qəbul etmək olar. Rəsmi Bakı bununla Kremlə demək istəyir ki, Dağlıq Qarabağda separtçılığın əsasını qoyan Köçəryanı dəstəkləməkdən imtina etsin. Köçəryan bundan sonra rəsmi Bakının danışıqlar apara biləcəyi rəqib persona ola bilməz.  

Rusiyanın birinci kanalında Vladimir Poznerə müsahibəsi zamanı Paşinyanın "Qarabağ Ermənistandır" açıqlamasının yanlış olduğunu bildirən Köçəryan bu cavabı ilə növbəti yalanı uydurmağa cəhd etdi ki, bu da özünü ifşadan başqa bir şey deyil. Çünki hər kəsə məlumdur ki, Azərbaycan torpaqlarının təxminən 30 il əvvəl işğalından sonra həmin ərazilərdə məhz bu şüarla qondarma rejimi elə Köçəryan özü yaradıb ki, bura Ermənistanın ərazisidir. İndi növbəti yalanla gündəmə gələn Köçəryanın güya Paşinyanın fikri ilə razı olmadığı təəssüratı yaratmaq cəhdi özünü gülüş predmetinə çevirməkdən başqa bir şey deyil. Sual yaranır ki, bu gün erməni baş naziri tənqid edən Köçəryan Paşinyan "Qarabağ Ermənistandır" bəyanatını verəndə, Cıdır Düzündə sərxoş halda yallı gedəndə niyə həmin vaxt Ermənistan hakimiyyətinə bu ritorikanın yanlış olduğunu müxtəlif kanallar vasitəsilə çatdırmamışdı? Köçəryan həqiqətən də erməni xalqının mənafeyini düşünsəydi, indiki mövqeyini müharibədən əvvəl sərgiləyərdi, xalqının gələcəyi naminıə azından Paşinyana dərin sularda üzdüyü barədə xəbərdarlıq edərdi. 

Amma Paşinyan da süddən çıxmış ağ qaşıq deyil. Kremldə özünü tərəfdaşdan çox müftəxor kimi göstərən erməni baş nazir Putinlə dünənki görüş zamanı Rusiya qarşısında bir neçə məsələ qaldırdısa, Putin kameralar qarşısındakı çıxışında yeganə məsələ ortaya qoydu. O da 10 noyabr və 11 yanvar bəyanatlarında region üçün alternativsiz inkişaf perespektivi açan kommunikasiyaların qurulması, bərpası məsələsi idi. Kreml rəhbəri bu çıxışı ilə həm də Şuşaya atılan Rusiya istehsalı olan "İsgəndər M" raketləri ilə bağlı Azərbaycan ictimiyyətində yaranan haqlı narazılığa əsas olmadığını və rəsmi Bakıya Ermənistanda hakimiyyətə kimin gəlməyindən asılı olmayaraq kommunikasiyların Rusiya üçün prearitet məsələ olduğuna işarə etmiş ola bilər.

Paşinyan bu görüş əsnasında qabartdığı "hərbi əsir" məsələsi ilə yenə də daxili auditoriylarına oynadı. O, Ermənistan ictimai rəyində əsas müzakirə mövzusu olan diversantlar məsələsini qabartdı ki, qarşıda gözlənilən parlament seçkisi öncəsi xalqına onları düşündüyünü, onlarla həmfikir olduğunu nümayiş etdirməklə daha çox seçicinin səsini qazansın.

Özünün 4 dəqiqə 37 saniyəlik giriş nitqində 10 dəfə öz "şparqalka"sına baxan Paşinyanın yeni AES tikintisi ilə bağlı Ruysiya rəhbərinə etdiyi təklif isə erməni siyasətinin primitiv variantlarından biridir. Paşinyan bu təkliflə seçki öncəsi Rusiya ilə böyük əməkdaşlıqlara hazır olduğunu göstərərək, həm Kremlin dəstəyini, həm də Rusiyadakı erməni lobbisinin dəstəyini qazanaraq hakimiyyətini toxunulmaz etmək haqda düşünür. 

Görüşdə "Dağlıq Qarabağ məsələsi hələ tam həll olunmayıb" deyən erməni baş nazir, bu açıqlaması ilə isə Azərbaycana təzyiq göstərmək niyyətindədir. Çünki Ermənistan daxilində Qarabağ ermənilərinə münasibət birmənalı deyil. Bu açıqlama ilə Paşinyan üçün əsas prioritet Azərbaycanı 10 noyabr və 11 yanvar bəyanatının icrasına görə onları tələsdirməməkdir. Onun bu mif, sabun köpüyündən başqa bir şey olmayan çıxışı isə bir daha göstərir ki, Nikol 44 günlük müharibədən hələ də dərs çıxarmaqda çətinlik çəkir.

Təhməz Əsədov