Milyonların sevdiyi ''Romeo'' - ''Həyat yoldaşımı Qız qalasından atmaqla hədələdim'' - FOTOlar

Tarix: 10 Iyul 2021 11:34

Yəqin əksəriyyət razılaşar ki, haqqına bəyənmədiyimiz kommunist rejimindən qalan yeganə müsbət cəhətlər sırasında o dövrün film, tamaşa və s. mədəni hadisələridir. Bu gün də tək yaşlı və orta nəsil deyil, cavanların da sevə-sevə baxdığı çoxsayı filmlər sırasında "Döyüşə ancaq qocalar gedir" filmi xüsusilə seçilir. Film sovet ideologiyasından, pafosdan uzaq filmlər sırasındadır. Yəqin ki, filmdə özbək aktyor, daha çox "Romeo" kimi tanıdığımız Rustam Saqdullayevi hər kəs tanıyır. Bu günlərdə akyor Rusiya telekanallarında yeni bir filmdə göründü. Və alışdığımız təyyarəçi formasında deyil, mülki formada rol alıb.

Zeynəb Xanlarova İran şahının verdiyi "kadillak"ını bizə verdi

Aktyor rus nəşrlərinə müsahibəsində ən əsası Bakıya sevgisindən danışıb. Müsahibəsində vaxtilə Bakıda olarkən az qala sevgilisini Qız qalasından yerə atmaq fikrinə düşməsi və ona şöhrət gətirən "Romeo" ləqəbi aldığı filmin 50 illiyinə necə hazırlıq görməsindən danışıb. Vaxtilə Bakıda çəkilişlərdə və festivallarda olduğunu, burada xeyli dostları olduğunu, 1986-cı ildə Azərbaycanda olduğunu və SSRİ xalq artisti Zeynəb Xanlarovanı gördüyünü deyib: "Zeynəb xanım İrandan şahın bağışladığı "kadillak"da gəlmişdi. Və böyük məmuniyyətlə maşınını bizə çəkilişdə istifadə etmək üçün verdi. O zaman "Naxçıvan" otelində qalırdıq. Sovet dövrünün ən gözəl dövrləri idi. "Özbəkfilm"dən Bakı peyzajlarını çəkmək üçün gəlmişdik. O zaman sovet filmlərinə şərq koloriti lazım olanda mütləq Bakıya gəlirdilər. Bakıda o zaman "107 təlimatına uyğun çevriliş" filmini çəkirdik, sonra 1998 və 2003-cü illərdə paytaxtda oldum. Sonra bir neçə dəfə festivallarda iştirak üçün gəldim. Bakı mənim çox xoşuma gəlir. Son vaxtlar xeyli gözəlləşərək ultramüasir meqapolisə çevrilib. Burada gözəl, yumor hissi olan, qonaqpərvər, mehriban insanlar yaşayır".

"Arşın mal alan" - əsrin filmidir

Aktyor bildirir ki, "ən əsası Azərbaycan xalqı musiqili insanlardır. Siz bir nəzər salın, görün nə qədər məşhuru, tanınmış musiqiçisi var. Mənim Bakı ilə ilk tanışlığım Rəşid Behbudovla başlayıb. Onun möhtəşəm səsi var və mahnıları indi də dillər əzbəridir. Onun oynadığı filmlər - məsələn, "Arşın mal alan" əsrin filmidir. İlk dəfə Behbudovun səsini Moskvada "Bakı" restoranında eşitdim. O zaman 10 yaşım var idi. Ondan oxumağı xahiş etdilər və oxudu. Səsi mənə elə təsir etdi ki, hələ də onun təsiri altındayam. Polad Bülbüloğlunun istedadı qarşısında baş əyirəm, eləcə də, böyük Müslüm Maqomayev. 1973-cü ildə azərbaycanlı aktyor Nodar Şaşıqoğlu ilə tanış oldum. Həmin il "Döyüşə ancaq qocalar gedir" filminin çəkilişləri gedirdi. Özbək dostum Batır Zakirovun yanına gələndə orada gördüm. Orada da biz tanış olduq. 2003-cü ildə böyük yazıçı Çingiz Abdullayevlə tanış oldum. Çox gözəl və mehriban insandır. Rüstəm İbrahimbəyov - böyük istetada malik bu insan "Səhranın bəyaz günəşi" filminin ssenarisini yazıb. Mənim o qədər bakılı dostum var ki, saysam qurtarmaz. Həyat yoldaşım da Azərbaycanı sevir. Bir dəfə onunla Bakıya kinofestivala gəldik. Və onu məşhur Qız qalasına apardım. Ona dedim ki, əgər mənim sözümə baxmasan səni buradan yerə atacağam", - deyərək gülür.

Məşhur aktyor arzularını da ifadə edib. Bildirib ki, Azərbaycan filmlərini Daşkənddə keçirilən beynəlxalq festivallarda olmasını istərdi. "Sizləri sadəcə bizə qonaq gəlməyə çağırıram. Bütün azərbaycanlılara Daşkənddən olan Romeoya salam deyirəm", - deyə fikrini tamamlayıb.

Azər Nuriyev