“Məni heç kim tanımırdı, amma daha sonra Leyli kimi tanınıb, parladım” - FOTO

Tarix: 17 Dekabr 2021 11:15

"Biz 28-29  ildir ki, Ağdamı, doğma elimizi məcburi şəkildə tərk etmişdik. Bu günlərdə anam və bacılarımla birlikdə "Ağdam və Mən" verilişi vasitəsilə Ağdama getdik. Doğma torpağımızı, ata yurdumuzu, atam Xosrov bəyin məzarını ziyarət etdik. Qəlbimizdə bir kədər, nisgil var idi. Anam Ağdama gedib-gələndən sonra təzyiqi 220-yə qalxdı. Ağdam alınanda gözləyirdik ki, yəqin nəsə bir şey yerində qalıb. Gedib görəndə ki, yurdumuz virandır, bu bizə çox pis təsir edir. Dişimizlə, dırnağımızla tikdiyimiz evi xarabalığa çeviriblər. Ağdamda hara baxırsan insanı dəhşət bürüyür. Bir tək təsəllimiz var ki, o torpaqlarda əvvəlki toy-büsatlı rayonumuzu, Ağdamımızı görəcəyik. Biz buna inanırıq".

Sonxeber.net xəbər verir ki, bunu moderator.az-a açıqlamasında xalq artisti Nəzakət Teymurova deyib. 

"Nəzakət xanım, övladınız təkdir. Tək övlad böyütməyin nə kimi çətinlikləri var? Qız övladını böyüdüb boya-başa çatdırmaq yəqin ki, daha çətindir" sualına isə sənətkar belə cavab verib:

"Həm oğlan, həm də qız övladını böyüdüb boya-çatdırmaq çətindir. Hərəsinin öz çətinliyi var. Deyim ki, qız övladını böyütmək daha çətindir, oğlanı böyütmək asan. Belə deyil! Əvvəl günündən gərək uşağın fikrini elmə, təhsilə yönəldəsən. Övlad da gələcəyin yükünü öz çiyinlərində daşımalı, oxuyub təhsil almalı, öz ayaqları üstündə durmağı bacarmalıdır. Mən də çalışmışam ki, qızıma hər şeydən öncə təhsil verib, onu ölkəmiz üçün savadlı bir insan kimi yetişdirim. Oğlum da olsaydı eyni fikirdə olardım. Hər şeydən əvvəl isə qızıma insan olmağı öyrətmişəm", - deyə sənətkar bildirib.

Nəzakət Teymurova 22 il oynadığı Leyli obrazından da danışıb:

"22 il Leyli obrazını oynamışam, düşünürəm ki, daha gecdir, yetər. Opera və Balet Teatrının ən əzəmətli, ən gözəl tamaşası elə "Leyli və Məcnun"dur. Bu teatrda ilk obrazım Leyli olub. Bu tamaşanı həm bölgələrdə, həm də xarici ölkələrdə oynamışam. Yaxşı ki, taleyimə bu obraz düşüb və opera səhnəsində də fəaliyyətim olub. Hər bir xanım xanəndə istəyər ki, Leyli obrazını oynasın. Asəf Zeynallı adına musiqi məktəbini bitirəndən sonra mən təyinatımı bu teatra aldım. Opera səhnəsi mənim üçün xanəndəliyin bir qoludur. Sevə-sevə Leylini, Şahsənəmi, Gülbaharı, bir neçə tamaşalarda xanəndə qız obrazlarını oynamışam. Yaxşı ki, bu səhnədən də tamaşaçı kütləsi yığmışam. Əksər xanəndələr tanınıb bu teatra gedirlər, mən isə tanınmaya-tanınmaya öz fəaliyyətimi bu teatrdan başlamışam. Məni heç kim tanımırdı, amma daha sonra Leyli kimi tanınıb, parladım", - deyə sənətkar bildirib.