Mingəçevirli qəhrəman - Onun gülərüz siması indi yalnız şəkillərdə qalıb - VİDEO

Tarix: 18 Dekabr 2021 12:18

Vətən müharibəsində şəhadətə ucalmış qəhrəmanlarımızı tanıtmağa davam edirik. Sıradakı süjetimiz Mingəçevir sakini Allahverdi Babayev haqqındadır. Döyüşə girdiyi andan bir an belə dayanmadan vuruşan, yoldaşlarını qələbəyə ruhlandıran qəhrəmanımız Talış-Suqovuşan istiqamətində gedən döyüşlərdə şəhadətə ucalıb. Ölümündən sonra 2 medalla təltif edilib.

44 günlük vətən müharibəsində əldə edilmiş parlaq zəfərdə onun da payı var. Söhbət Mingəçevir sakini Allahverdi Babayevdən gedir.

O, 1989-cu il martın 24-də anadan olub. Orta məktəbi bitirdikdən sonra hərbi xidmətə yollanıb. Xidmətini başa vurduqdan sonra MAXE kimi yenidən ordu sıralarına qayıdıb.

Allahverdi Babayev müharibənin ilk günündə şəhadətə yüksəlsə də, döyüşdə göstərdiyi şücaəti unudulmur. Hərbçi yoldaşları qəhrəmanımızın müharibənin ilk günündə bir saniyə dayanmadan döyüşdüyünü, yaralılara kömək etiyini, texnikaların təhlükəsiz irəliləməsi üçün özünü irəli atdığını bildiriblər. Süheyl Babayev kiçik qardaşı haqqında qürurla danışır.

Anası Xəzirə Babayeva deyir ki, övladı ilə şəhid olmazdan bir neçə saat əvvəl danışıb.

Bu gün arzusunda olduğu zirvəyə yüksələn qəhrəmanımızın ruhu şaddır. Çünki onun arzuladığı qələbə Azərbaycan əsgərinin, işğal altında olan torpaqlar isə öz sahiblərinindir. Talış-Suqovuşan istiqamətində gedən döyüşlərdə şəhid olan Allahverdi Babayev  ölümündən sonra "Vətən uğrunda" və "Cəsur döyüşçü" medalları ilə təltif edilib.