''Cəsarətli olmadığımız üçün günahkarıq'' - ''Face'' də Rusiyanı tərk etdi - FOTO

Tarix: 13 Mart 2022 16:32

Rusiyalı reper "Face" (əsl adı - İvan Dryomin) ölkəsinin Ukraynaya qarşı həyata keçirdiyi hərbi əməliyyatları pisləyib.

Sonxeber.net axşam.az-a istinadən bildirir ki, bu barədə instaqram hesabında yazan ifaçı Rusiyanı tərk etdiyini vurğulayıb.

O, uzun müddət baş verənlərə səssiz qalmasını belə açıqlayıb:

"Adım İvan Dryomindir, məni daha çox "Face" səhnə adımla tanıyırlar, milliyyətim rusdur, bütün həyatımı Rusiyada yaşamışam. Rusiya ilə Ukrayna arasında müharibə başlayandan bəri çoxları məndən soruşur ki, niyə səsini çıxarmıram, niyə susuram?

Son iki həftədə başıma gələnləri sizə danışmaq istəyirəm. Cavabım sadədir - şokda idim, sadəcə olaraq uyuşmuşdum, bəli, bunun baş verdiyinə və hələ də davam etdiyinə inana bilmirəm: Ölkəmin bu işə qarışması, dost olduğum insanların bunu "başa düşməsi", hətta bəzilərinin də bəyənməsi. O insanlar ki, onlarla qonşuyam, eyni mağazaya gedirəm.

Daha pisi odur ki, o biri tərəfdə mənim də çox sevdiyim bir ölkədir. Həmişə Ukraynaya gəldiyim üçün xoşbəxt olmuşam. Bəli, sərhəddə çətinliklərlə üzləşdiyim olub, amma sonda həmişə özlərindən biri kimi səmimi qarşılayıblar. Odessa, Xarkov, Dnepr, Kiyev, bütün bu şəhərlərdə olmuşam, əksəriyyətində bir neçə dəfə.

Bunun baş verməsində kim günahkardır? Fikrimi bilmənizi istəyirəm.

Birincisi, Rusiya dövləti günahkardır. Onların necə insanlar olduğunu bilirəm. Yeddi ilə yaxındır ki, öz ölkəmdə musiqi layihəmin ayaqda qalması üçün hakimiyyətlə mübarizə aparmışam. Uduzdum, döyüşdə uduzdum, amma müharibəni yox. Onlar heç vaxt üzümə deyə bilməyiblər ki, mən onların düşməniyəm. Özlərinə rus ruhunun daşıyıcısı deyirlər, amma içləri xarici əskinaslarla doldurulmuş qorxaqdırlar. Arxanızca iş görür, təşkilatçıları və məkanları hədələyirlər, sonra da mediaya deyirlər ki, siz yalançısınız. Mən musiqiçiyəm, sadəcə musiqi hazırlamağa və ifa etməyə çalışdım, lakin müasir Rusiyada bu, demək olar ki, mümkün deyil".

O, Ukraynadakı hadisələrdə hər kəsin günahkar olduğunu və bu müharibənin bitməsi gərəkdiyini qeyd edib:

"Başqa kim günahkardır?

Mən, bütün ziyalılar, musiqiçilər. Hər birimizin kifayət qədər cəsarəti olmadığı, daha çox şey edə bildiyimiz üçün. Qorxduq və ya çox tənbəl idik.  Sonda üç şeyi qeyd etmək istəyirəm.

Birincisi: dövlətimizi və ordumuzu ağlını toplamağa, qardaş xalqın ərazisində şəhərlərin, yaşayış məntəqələrinin dağıdılmasına son qoymağa çağırıram.

İkincisi: Ölkəmizin sizə çəkdiyi əziyyətə görə bütün Ukrayna xalqından üzr istəyirəm. Dövlətimiz üçün, özüm üçün, xalqımız üçün üzr istəyirəm. Çünki kimsə bunu etməlidir..."

Reper sonda Rusiyanı tərk etdiyini və buradakı fəaliyyətini dayandırdığını yazıb:

"Xüsusilə mənə və karyerama aid olan üçüncü şey:

Bir rus sənətçisi və vətəndaşı kimi indi praktiki olaraq mövcud deyiləm. Daha Rusiyaya vergi verməyəcəyəm, getdim və bir daha buraya gəlməyəcəyəm, burada konsert verməyəcəyəm...

Nə vaxtsa Rusiya ləyaqətli bir dövlətə çevriləcək, müasir və ağlabatan zehniyyətə malik insanlar var, amma bu gün təəssüf ki, belə deyil. Ümid edirəm ki, nə vaxtsa yenidən ailəmi, tamaşaçılarımı görəcəyəm və xalqım üçün rus dilində mahnı oxuyacağam. Bunun baş verəcəyinə inanıram. Çünki istəsəniz də, istəməsəniz də Rusiyanın gələcəyi mənim kimilərindir, sizin kimilərin yox. Rusiyanın gələcəyi əllərində qumbaraatan, pulemyot olanların yox, fırça və mikrofon tutanlardır. Rusiyanın gələcəyi düşüncə və azadlıqdır. Rusiyanın gələcəyi bizik.

Müharibəyə yox. Ukrayna üçün azadlıq".