Gənc müğənni Amidin şantaj etdiyi qız da müğənni imiş

Tarix: 9 Iyun 2022 08:00

Gənc müğənni Amid Sədanın sevgilisini şantaj etdiyinə görə həbs edilməsi ilə bağlı bəzi faktlar üzə çıxıb.

Sonxeber.net "qafqazinfo"ya istinadən xəbər verir ki, müğənninin çılpaq görüntülərlə hədə-qorxu gəldiyi gənc qız onun duet ortağı olub.

Araşdırmalar zamanı məlum olub ki, Lalə Əlizadə (ad və soyad şərtidir) Amidlə birlikdə bir neçə mahnı ifa edib və klip çəkdirib.

Amid onunla evlənəcəyini bildirərək müxtəlif yerlərdə görüşüb. Həmçinin "Rent a Car"dan avtomobil icarəyə götürərək Laləni Ağcabədiyə aparıb və orada qohumları ilə tanış edib. Lakin sonradan cütlüyün münasibəti pozulub və Amid Səda müğənni həmkarını intim görüntülərini yayacağı ilə hədələyərək ondan pul tələb etməyə başlayıb.

Lalə Ağazadə bildirib ki, Amid onun hoteldə çəkilmiş bəzi görüntülərini "TikTok"da paylaşıb və bundan sonra rüsvay olmamaq üçün onunla görüşərək pul verməyə razı olub.

Qeyd edək ki, keçmiş sevgilisinə hədə-qorxu gələrək ondan 1500 manat pul və 700 manat dəyərində mobil telefonunu aldığına görə Amid Səda barəsində Cinayət Məcəlləsinin 182-ci (hədə-qorxu ilə tələb etmə) maddəsi ilə iş açılıb.

Abşeron Rayon Polis İdarəsində açılmış cinayət işinin materialları rayon məhkəməsinə göndərilib. Məhkəmənin 3 iyun 2022-ci il tarixli hökmü ilə Amid Sədaya 3 il müddətinə həbs cəzası verilib.

Qeyd edək ki, Amid Səda gənc müğənni kimi populyarlıq qazanıb, onun "YouTube" platformasında yerləşdirdiyi mahnı və kliplərinə yüz minlərlə baxış gəlib.