''Xalqlar dostluğu'' yaxınlığında ''yoxa çıxan'' biznesmen saxlanılıbmış - Bakıda keçirilən xüsusi əməliyyatın təfərrüatı - FOTO

Tarix: 13 Noyabr 2022 13:36

Türkiyə kəşfiyyatının Bakıda keçirilən xüsusi əməliyyatının təfərrüatı bəlli olub.

Sonxeber.net el_alioglu telegram kanalına istinadla xəbər verir ki, axtarışda olan Uğur Dəmirok Türkiyə Milli Kəşfiyyat İdarəsinin (MİT) Bakıda keçirdiyi xüsusi əməliyyat zamanı saxlanaraq aparılıbmış.

67 gün əvvəl gerçəkləşdirilmiş xüsusi əməliyyatın təfərrüatları indi bəlli olub.

Silahlı terror təşkilatı yaratmaq və idarə etmək ittihamı ilə beynəlxalq axtarışa verilmiş FETÖ üzvü Uğur Dəmirok bu il sentyabrın 6-da səhər saatlarında Bakıda, "Xalqlar Dostluğu" metrostansiyasının yaxınlığında "yoxa çıxmışdı". 

- Biznesmenin yoxa çıxması barədə onun ailə üzvləri məlumat verib. Dəmirokun Bakıdakı taleyi ilə bağlı Türkiyə parlamentində də məsələ qaldırılıb, hadisənin hansı şəraitdə baş verdiyini aydınlaşdırmaq üçün hüquq-mühafizə orqanlarına müraciətlər edilib.

Bakıda Uğur Dəmirok həyat yoldaşı Nurdanla birlikdə tibbi cihazların satışı biznesi ilə məşğul olub və ailəsi ilə "Xalqlar dostluğu" metrostansiyasının yaxınlığında yaşayıb. 

Sentyabrın 6-da səhər saatlarında iş adamı işə gedərkən maskalı naməlum şəxslər tərəfindən saxlanılıb və hadisə şahidlərinin sözlərinə görə, şüşələrinə qara plyonka vurulmuş avtomobilə sıxışdırılıb.

Demirokun arvadı yerli polis idarəsindən ərinin "Türkiyəyə getdiyini" öyrənib, lakin hadisə baş verən gün onun pasportu olmadığından bunun məcburi qaçırma olduğuna şübhə yox idi. 

Daha sonra ailə üzvləri Dəmirokun Ankaradakı həbsxanada olduğunu öyrənə bilsələr də, onun saxlanılması ilə bağlı rəsmi məlumat yoxdur.

Uğur Dəmirok FETÖ terror təşkilatının üzvü olub və 2016-cı il iyulun 15-də ölkədə baş vermiş hərbi çevrilişə cəhddən sonra xaricə qaçıb. 

Dəmirok Türkiyə Silahlı Qüvvələrində gizli FETÖ strukturunda fəal çalışıb, həmçinin təşkilat üzvlərinin gizli yazışmalar üçün quraşdırdığı "ByLock" proqramının istifadəçisi olub.