Milli Məclis tarixində BİR İLK

Tarix: 17 Noyabr 2022 23:09

Bu gün Milli Məclisin növbəti plenar iclası keçirilib. 2023-cü ilin dövlət büdcəsi layihəsinə həsr olunan iclasda Azərbaycan parlamentinin tarixində bir ilkə imza atılıb.

Belə ki, çıxışa yazılmış 50-dən çox deputatın hər birinə söz verilib və onlar yaradılmış şəraitdən istifadə edərək öz təkliflərini səsləndirə biliblər. Bir plenar iclasda 50-dən çox deputatın çıxış etməsi Milli Məclisdə ilk dəfə müşahidə olunan haldır.

Sonxeber.net modern.az-a istinadən bildirir ki, bununla bağlı Gundem.az-a açıqlama verən deputat Məlahət İbrahimqızı Milli Məclisin bugünkü iclasını tarixi hadisə adlandırıb:

"Milli Məclisdə təmsil olunan hər bir deputatın çıxış etməsi vacibdir. Bu, ilk növbədə onun vəzifəsidir. Bu gün müzakirə olunan mövzu olduqca önəmli idi. Biz Azərbaycan Respublikasının 2023-cü il üçün büdcəsinin birinci oxunuşunda iştirak etdik. Bu mövzuda deputatların fikirlərinin dinlənilməsi olduqca əhəmiyyətli idi. Çünki büdcə dövlətin və xalqın birgə fəaliyyətinin göstəricisidir. Xalqın yaşayış səviyyəsinin göstəricisidir. Bugünkü iclasda çıxışa yazılmış hər bir parlamentari öz fikirlərini söyləyə bildi. Bu, həqiqətən tarixi hadisədir. Çünki bütün deputatlar öz fikirlərini daha detallı deyə bildilər".

M.İbrahimqızı gələn ilin dövlət büdcəsinin müstəqillik tarixində ən böyük büdcə olduğunu diqqətə çatdırıb:

"2023-cü ilin dövlət büdcəsi müstəqillik dönəminin ən zəngin büdcəsidir. Bu gün dünya postpandemiya dönəmini yaşayır, digər yandan Rusiya-Ukrayna müharibəsi davam edir, üstəlik ölkəmiz postmünaqişə çağındadır. Bütün bunlara baxmayaraq, büdcədə 4 milyarda yaxın artım var. Bütün sahələrdə nəzərəçarpacaq artımları görürük".

Deputat Ceyhun Məmmədov da vurğulayıb ki, bu gün parlament tarixində bir ilkə imza atılıb:

"Milli Məclisin sədri, hörmətli Sahibə xanım bütün parlamentarilərə şərait yaratdı ki, öz fikirlərini desinlər. 4 nəfər texniki səbəbdən siyahıya düşə bilməmişdi. Sahibə xanım onlara da şərait yaratdı. Biz bundan qürur duyduq".

C.Məmmədov hesab edir ki, bugünkü müzakirələr Azərbaycanda parlament mədəniyyətinin inkişaf etdiyini göstərdi:

"Belə şəraitdə bütün deputatlar öz fikir və təkliflərini dilə gətirə bilirlər. Eyni zamanda, təmsil etdikləri regionların problemlərini qaldıra bilirlər. Bütün deputatlara təklif və fikirlərini səsləndirmək üçün şərait yaradılması təqdirlə qarşılandı. Bu, Azərbaycanda parlament mədəniyyətinin inkişaf etdiyini, qarşılıqlı anlaşmanın formalaşdığının göstəricisidir. Ümumiyyətlə, bu, parlament mədəniyyətinin möhkəmlənməsinə cəmiyyət tərəfindən yüksək etimad göstərilməsinə şərait yaradan məsələdir. Bu ənənə daha da inkişaf edəcək. Biz gələcəkdə bunun təzahürünü görəcəyik".

Deputat Cavid Osmanov isə qeyd edib ki, bu gün keçirilən plenar iclasda çıxışa yazılmış bütün parlamentarilərə söz verilməsi hər kəsdən tərəfindən yüksək qiymətləndirilir:

"Artıq iki gündür ki, 2023-cü ilin dövlət büdcəsi zərfi Milli Məclisdə müzakirə edilir. Müzakirə olunan büdcə müstəqil Azərbaycan tarixində ən böyük büdcədir. Burada vacib məqam çıxışa yazılmış 50-dən çox deputata Sahibə Qafarova tərəfindən şərait yaradılması oldu. Hər kəs büdcə zərfinə dair təkliflərini dilə gətirə bildi. Bu, əlbəttə ki, bütün parlamentarilər tərəfindən yüksək qiymətləndirilir.

Hesab edirəm ki, bu addım hakimiyyətin qanunverici və icraedici orqanlarının qaşılıqlı əməkdaşlığının daha səmərəli qurulması baxımdan vacibdir. Bu, həm də deputatlar tərəfindən səsləndirilən fikirlərin növbəti büdcədə nəzərə alınması baxımından əhəmiyyətlidir.

Ümumilikdə, qeyd etmək istəyirəm ki, 6-cı çağırış Milli Məclisin iclaslarına nəzər saldıqda deputatlara ölkədə, regionda baş verən hadisələr və seçicilərini narahat edən məsələlər barədə danışmaq üçün həmişə şərait yaradıldığını görə bilərik".