“Elə bilirsiniz ki, Maykl Cekson, Merilin Monro obrazını yaratmaq asandır..?” - FOTO

Tarix: 19 Yanvar 2023 16:25

"Özümü, yaradıcılığımı teatra bağlamışam. Çəkilən seriallardan dəvətlər də alıram, amma hər zaman seçim edirəm. Keyfiyyətsiz seriallarda və filmlərdə çəkilmək istəmirəm. Bu da mənim seçimimdir. Çəkilmək xatirinə çəkilsəydim çox film və seriallarım olardı. Amma kifayət qədər çəkilmişəm. Bizdə serial və film sahəsində naşi insanlar çoxdur. Aparıcını da seriala çəkirlər. Seriallarda professional aktyorlar çəkilməlidir. Ola bilər ki, xarici görünüş baxımından kimsə çəkilir, amma aktyorluq qabiliyyəti olmadan o necə filmdə rol ala bilər?"

Sonxeber.net xəbər verir ki, bunu moderator.az-a açıqlamasında əməkdar artist, Akademik Rus Dram Teatrının aparıcı aktrisası Naina İbrahimova deyib. 

"İncəsənətdə heç bir çərçivə olmamalıdır. Sənətçi, aktrisa cəsarətli olmalıdır, heç nədən qorxmamalıdır. Mentalitet sözü incəsənətdə keçmir. Bizdə açıq-saçıq rollara çəkilən aktrisalar bəzən çox tənqid olunur. Bu da rejissordan asılıdır. Ola bilər ki, sənətçi həmin rol üçün kobud seçilib. Burada artıq günahkar sənətçidə yox, rejissordadır" deyə aktrisa bildirib.

Tanınmış aktrisa yaratdığı obrazlardan da danışıb.

"Mən 5 yaşımdan foto çəkilişlərdə iştirak edirəm. Reklamlara çəkilmişəm, ən yaxşı foto rəssamlarla işləmişəm. Amma günlərin bir günü bu məni bezdirdi. Çünki mən aktrisa idim, məni teatr tərbiyə etmişdi, teatr yaratmışdı. Ona görə də aktrisa kimi işləmək istədim. Yaratdığım obrazlara görə bir çox mükafatlar almışam. Elə bilirsiniz ki, Maykl Ceksonun obrazını yaratmaq asandır? Çox çətin obrazdır, həddən artıq çətin. Kişilərə qadın rolunu oynamaq asandır, onlar komik görünür. Amma qadınlar kişi rolunu oynayanda çətin olur. Obrazların yaxşı, inandırıcı alınması üçün təkcə qrim bəs etmir. Bu obrazları yaratmaq daxilimdəki aktyorluq sənəti ilə bağlıdır. İlk obrazım Kleopatra oldu. Maykl Cekson və Çarli Çaplin obrazına görə Azərbaycan-Almaniya cəmiyyəti tərəfindən mükafatlandırılmışam. Bütün bu layihələrimin arxasında yuxusuz gecələr, ac-susuz qaldığım günlər durur. Bir sözlə hər çətinliyə dözürəm" deyə aktrisa bildirib.

Əməkdar artist atası, xalq rəssamı Ağəli İbrahimovdan da danışıb.

"Bu cür valideynlərimə sahib olduğum üçün öncə Allahıma, daha sonra isə taleyimə borcluyam. Özümü onlarsız təsəvvür edə bilməzdim. Çox gözəl bir ailəyə sahibəm" deyə sənətçi bildirib.