Dopinqə qarşı mübarizə hüququ Gənclər və İdman Nazirliyindən alınaraq digər nazirliyə verilib

Tarix: 21 Fevral 2023 16:18

Azərbaycanda dopinqə qarşı mübarizə hüququ Gənclər və İdman Nazirliyindən (GİN) alınaraq Səhiyyə Nazirliyinə verilib.

Sonxeber.net AZƏRTAC-a istinadən bildirir ki, bununla bağlı Prezident İlham Əliyev iki fərman imzalayıb.

Belə ki, fərmanla "Azərbaycan Respublikasının Gənclər və İdman Nazirliyi haqqında Əsasnamə"də dəyişiklik edilib.

Sənədə əsasən, GİN-in "İdmanda dopinq vasitələrindən və üsullarından istifadəyə qarşı mübarizə haqqında" Azərbaycan Respublikasının Qanununa uyğun olaraq, terapevtik istifadəyə icazə, intizam və apellyasiya qurumları yaratma və onların əsasnamələrini təsdiq etmə hüququ ləğv edilib.

Prezidentin digər fərmanı ilə "Azərbaycan Respublikasının Səhiyyə Nazirliyi haqqında Əsasnamə"də dəyişiklik edilib. Sənədə əsasən Səhiyyə Nazirliyinə "İdmanda dopinq vasitələrindən və üsullarından istifadəyə qarşı mübarizə haqqında" qanuna uyğun olaraq, terapevtik istifadəyə icazə, intizam və apellyasiya qurumları yaratmaq və onların əsasnamələrini təsdiq etmək hüququ verilib.