Sumqayıtda baş mühəndisin əhaliyə göndərdiyi BİLDİRİŞ səs-küy yaradıb... - VİDEO

Tarix: 7 Iyun 2023 17:32

Sumqayıt şəhərində İnşaatçılar qəsəbəsinin beton zavod adlanan ərazisində yaşayan sakinlərə evlərini qısa vaxt ərzində tərk etmələri üçün bildirişlər göndərilib.

Sonxeber.net Xəzər Xəbər-ə istinadən xəbər verir ki, bildirişdə "qanunsuz zəbt edilmiş ərazini qısa müddətdə boşaldın" yazılır.

"Bir neçə gün bundan əvvəl göndərilən bildirişlər  sakinləri təşvişə salıb. Bəziləri isə bunun yalnış məlumat olduğunu deyir."

Məsələ ilə bağlı Azərenerji ASC-nin Sumqayıt Yüksək Gərginlikli Elektrik Şəbəkəsindən  "Xəzər Xəbər"ə bildirilib ki, Beton zavod deyilən  ərazidə yaşayan sakinlərin heç biri evindən çıxarılmayacaq və belə bir plan  yoxdur.

Hazırda həmin ərazidə köhnə xətlərin yenisi ilə əvəzlənməsi prosesi gedir. Bu iş ona görə həyata keçirilir ki, köhnə xətlər qırılıb sakinlərin həyatı üçün təhlükə yaratmasın.

Digər tərəfdən, həmin ərazidə əvvəldən yaşayan sakinlərin heç biri mənzilindən çıxarılmır.

"Amma yüksək gərginlikli elektrik xəttlərinin altında bundan sonra ev tikilməsinə icazə verilməyəcək."

Şəbəkədən o da bildirildi ki,vətəndaşlara verilən bildirişlər baş mühəndis tərəfindən tərtib edilib.

Bildirişdə qeyd olunanlar yalnız həmin ərazidə yüksək gərginlikli elektrik xətlərinin altında yeni tikilmiş və tikilməkdə olan evlər üçün nəzərdə tutulub. Bildirişlərin köhnə mənzillərə verilməsində isə səhvlik olub.

Mövzu ilə bağlı daha ətraflı videomaterialı təqdim edirik: