''Hizbullah'' bu məsələdə qərarsız qaldı

Tarix: 2 Noyabr 2023 09:40

""Hizbullah"ın Qəzza zolağında İsrailin quru reydlərinin genişlənməsinə cavabı indiyədək "narahatedici" olsa da, təmkinli olub", - "The New York Times" yazır.

Sonxeber.net axar.az-a istinadən bildirir ki, "Hizbullah"ın 2006-cı ildə İsraillə apardığı son müharibə ilə müqayisədə indi təşkilat daha müasir silahlara və hazırlıqlı döyüşçülərə malikdir. Buna baxmayaraq, o, indiyə qədər yalnız İsrail qüvvələri ilə məhdud atışmalara girib. Nəşrin yazdığına görə, İsrail hərbçilərinin əksəriyyəti Qəzza zolağında cəmləşdiyi bir vaxtda Hizbullah ölkənin şimalında hücumlarını genişləndirərək İsrailə təzyiq göstərə bilər, lakin daxili və regional hesablamalar ucbatından geri çəkilir.

Dağıdıcı iqtisadi böhrandan əziyyət çəkən Livanda İsraillə müharibəyə xüsusi bir istək yoxdur. Bundan başqa, regional səviyyədə "Hizbullah"ın ikinci cəbhə açması ABŞ-ı İsrailə yardım etməyə sövq edə bilər.

Beyrutdakı regional diplomat "Hizbullah"ın daha geniş müharibəyə səbəb olmamaq üçün hücumlarını dayandırdığını bildirib. Onun sözlərinə görə, təşkilat gizli şəkildə tərəfdaşlarına "HƏMAS yaxşı vəziyyətdədir və hələ ki, köməyə ehtiyac duymur" deyir.