Rusiya təzyiq etsə... - ABŞ-ın İrəvanla 8 bəndlik sazişi

Tarix: 15 Noyabr 2023 08:38

ABŞ və Ermənistan arasında iki ölkənin bir sıra müvafiq departamentlərinin yüksək vəzifəli şəxsləri səviyyəsində intensiv hökumətlərarası məsləhətləşmələr aparılıb. 

Sonxeber.net xəbər verir ki, İrəvan və Vaşinqton arasındakı razılaşmaya görə, Rusiya Ermənistana təzyiq göstərsə və ya embarqo tətbiq etsə, ABŞ aşağıdakı sahələrdə güclü dəstək verəcək:

1. Ermənistanın dizel yanacağı və enerji ehtiyatları ilə təmin edilməsi.

2. Metsamor AES-in alternativ  nüvə yanacağı ilə təmin edilməsi (hazırda buna Rosatom cavabdehdir).

3. Birləşmiş Ştatlar həmçinin AES-in idarə edilməsi və istismarının təmin edilməsi üçün Ermənistana bütün lazımi texniki dəstəyi göstərməyə hazırdır.

4. Rusiya Federasiyasından buğda və buğda unu idxal edən Ermənistanın müvafiq alternativ təchizatla təmin edilməsi. 

5. Qeyri-qanuni rejimin buğda yetişdirdiyi Azərbaycan ərazilərinin işğaldan azad edilməsindən sonra Ermənistan üçün ərzaq təhlükəsizliyi problemi xüsusilə kəskinləşib.

6. Lazım gələrsə, erməni internet provayderləri Amerika peyk interneti ilə təmin olunacaqlar.

7. ABŞ Ermənistanda mümkün xarici valyuta kəsiri Rusiyanın sərt sanksiya addımları nəticəsində yaranarsa, onu ödəməyə hazırdır.

8. Ermənistan Silahlı Qüvvələri lazımi hərbi texnika, uniforma və silahlarla təmin olunacaq, Ermənistan təhlükəsizlik orqanları, o cümlədən polis lazımi texniki dəstək alacaq.

Anladığımız kimi, amerikalılar heç vaxt Rusiya bloklarının (KTMT, Aİİ) üzvü olan ölkəyə belə təhlükəsizlik şəbəkəsi verməyəcəklər.  Və əgər Vaşinqton regionumuzun mürəkkəb coğrafiyasında buna zəmanət verirsə, o zaman Ermənistanın bunun müqabilində hansı addımları atacağını təxmin etmək olar: Rusiya qoşunlarının tamamilə çıxarılması, KTMT-dən, Avrasiya İqtisadi Birliyindən çıxmaq.

Digər sual isə Rusiyanın necə, nə vaxt və hansı addımlar atacağıdır.  İndiyədək Moskva Paşinyana qarşı fərdi şifahi hücumlar və Birinci Kanalda yayımlanan verilişlərdən başqa heç bir tədbir görməyib.  Lazımi alətlər olsa da: Paşinyan komandasının fəxr etdiyi bütün iqtisadi artım Rusiyadan gələn maliyyə axınları və güzəştli Rusiya xammalı üzərində qurulub.

Görəcəyik ki, Kreml nə vaxta qədər açıq-saçıq xəyanətə, Ermənistanın şıltaqlığına dözəcək.  Bu və ya digər şəkildə biz regionumuzun bütün geosiyasətinin sadəcə heyrətamiz şəkildə yenidən formatlaşdırılmasının şahidi oluruq.