Arif Əsədovdan Türkiyədə uğursuz oynayan futbolçularımızın çıxışına MÜNASİBƏT

Tarix: 11 Mart 2024 14:16

"Legioner həyatı yaşayan futbolçularımız çox azdır. Biz onları qorumalıyıq, itirməməliyik".

Sonxeber.net İdman.Biz-ə istinadən bildirir ki, bunu futbol üzrə Azərbaycan millisinin baş məşqçisi Arif Əsədov deyib.

O, Türkiyə klublarında çıxış edən yığma üzvlərinin son turlarda yerini əldən verməsinə münasibət bildirib. Təcrübəli mütəxəssisin sözlərin görə, hər bir futbolçunu diqqətlə izləyir: "Onların oynamamasının müxtəlif səbəbləri ola bilər. Bunu zədə, yeni məşqçinin gəlməsi və taktiki gedişlərlər də bağlamaq mümkündür. Əsas odur ki, hazırda yığma üzvlərində ciddi zədə yoxdur. Təbii ki, bu dönəmdə futbolda belə hallar olur. O baxımdan konkret nəsə demək çox çətindir. Seçim azdır. Elə də çox futbolçularımız yoxdur. Buna görə də onlara dəstək olmalıyıq".

Əsədov "FİFA Series"də Monqolustan və Bolqarıstana qarşı matçlar üçün heyəti də açıqlamağa tələsmir. O deyib ki, stabillik olmadığı üçün bir qədər gözləməlidir: "Son tura kimi heyəti açıqlamağa çalışacağıq. Yığma isə martın 18-i bir araya gələcək".

Milli hər iki matçı Bakıda keçirəcək. Azərbaycan yığması martın 22-də Monqolustanla, 3 gün sonra isə Bolqarıstanla üz-üzə gələcək.

Qeyd edək ki, futbolçularımızdan son 3 matçda Renat Dadaşov Super Liqada "Hatayspor"un heyətində cəmi 53, Ramil Şeydayev 1-ci liqada "Kocaelispor"da 49, Coşqun Diniyev "Ümraniyəspor"da 63, Vüsal İsgəndərli "Boluspor"da 3 dəqiqə meydanda olub. "Manisaspor"un şərəfini qoruyan Sərtan Taşkın 6 görüşdə 2 qırmızı vərəqə alıb. Bəxtiyar Həsənalızadə isə zədədən qayıtdıqdan sonra hesabat turunda 90 dəqiqə meydanda olub.

Onlardan fərqli, "Adana Dəmirspor"un qapıçısı Şahruddin Məhəmmədəliyev 1-2 oyun istisna olmaqla, daim çərçivədədir.