Bu ərazilərdə siqaret kötüyünü yerə atmayın! – CƏRİMƏLƏNƏCƏKSİNİZ

Tarix: 2 Aprel 2025 19:38

Ötən ildən etibarən tütün məmulatları tullantılarının ətraf mühitə atılmasına görə cərimənin məbləği artırılıb. Həmin qaydaya əsasən tütün məmulatları tullantılarının ətraf mühitə atılmasına görə cərimənin məbləği 50 manatdan 300 manata qaldırılıb. 

Lakin vətəndaşların bu məsələdə məlumatsız olmaları onların yüksək məbləğdə cərimələnmələri ilə nəticələnir. Bir çoxları isə bu qanunun sadəcə paytaxt ərazisini əhatə etdiyini, qəsəbə yaxud kəndlərə şamil olunmadığını zənn edir. 

Mövzu ilə bağlı DİN-in Mətbuat Xidmətinin əməkdaşı polis leytenantı Elbrus İbrahimov yenisabah.az-a bildirib ki, Polis əməkdaşları tərəfindən tütün məmulatlarından istifadə ilə bağlı paytaxtda, eləcə də digər şəhər və rayonlarda nəzarət-profilaktik tədbirlər həyata keçirilir:

"Polis əməkdaşları tərəfindən aparılan profilaktik tədbirlər ətraf mühitin çirklənməsinin minimuma endirilməsi və mühafizəsinin təkmilləşdirilməsinə, habelə ölkəmizdə ekoloji təhlükəsizliyin təmin olunmasına yönəlib. 

Polis əməkdaşları tərəfindən tütün məmulatlarından istifadə ilə bağlı paytaxtda, eləcə də digər şəhər və rayonlarda nəzarət-profilaktik tədbirlər həyata keçirilir. İctimai yerlərdə, dayanacaqlarda, insanların sıx toplaşdığı ərazidə, həmçinin urnalardan kənarda tütün məmulatlarından istifadə edən şəxslər barəsində inzibati tənbeh tədbirlərinin görülməsi diqqət mərkəzində saxlanılır. 

Bununla yanaşı tütün məmulatlarından istifadə edilərkən qalığını ətraf mühitə atmaq da qanunvericiliklə qadağandır. Bu qaydaya əməl etməyən şəxslər barəsində inzibati tənbeh tədbirləri tətbiq olunur. Ona görə də sağlam gələcək naminə hər kəsi sanitar-gigiyena qaydalarına riayət etməyə, ətraf mühiti və təbiəti təmiz saxlamağa dəvət edirik".