Çində istehlak mallarının qiyməti 2,9 faiz artıb

Tarix: 10 Yanvar 2020 08:38

Dünyanın ikinci iqtisadiyyatına sahib Çində ötən il istehlak mallarının qiyməti orta hesabla 2,9 faiz artıb.

Sonxeber.net AZƏRTAC-a istinadən bildirir ki, ölkənin Milli Statistika Bürosu istehlak mallarının artım rəqəminin hökumətin hədəflədiyi səviyyədə (3 faiz) olduğunu bildirib. Dekabrda bu rəqəm noyabrda olduğu kimi, 4,5 faiz təşkil edib. Buna səbəb ərzaq məhsullarının qiymətinin 17,4 faiz, xüsusən də dünyanın ən böyük donuz əti bazarı olan Çində bu növ ətin qiymətinin təxminən 2 dəfə bahalaşmasıdır. Donuz ətinin qiymətinin belə yüksəlməsinə Afrika donuz qripi xəstəliyi və bir neçə başqa amil səbəb kimi göstərilir. Bunu nəzərə alan hökumət bazarda qiyməti tənzimləmək üçün donmuş donuz əti ehtiyatından ötən müddətdə bazarlara bir neçə dəfə ət çıxarıb. Noyabrda donuz ətinin qiyməti 110 faiz qalxmışdı.

Dekabrda şəhər və kənd yerlərində istehlak mallarının artımı müvafiq olaraq 4,2 və 5,3 faiz olub.

Milli Statistika Bürosunun hesabatına əsasən, ötən il ölkədə istehsal qiymətləri indeksi 0,3 faiz azalıb.