Apple FBI-a kömək etməməkdə israrlıdır

Tarix: 11 Fevral 2020 21:16

Son illərdə Apple ilə Federal Təhlükəsizlik Bürosunun (FBI) "arası" çox da yaxşı deyil. Apple və FBI kəlmələri bir arada işlənəndə iPhone şifrəsi böhranları ağla gəlir. Bilməyənlər üçün qısaca izah edək: daha öncə bir terroistə aid iPhone-un şifrəsini qırmaq məsələsində FBI-a kömək etməyən Apple bu mövzuda daha bir tələbə də mənfi reaksiya göstərib.

Sonxeber.net ted.az-a istinadən bildirir ki, məlumatları qanun çərçivəsində FBI ilə bölüşən Apple yenə iPhone-un şifrəsini açmayıb. Bu dəfə şifrəli iPhone ötən ilin dekabrında ABŞ-ın Florida ştatındakı Pensacola hərbi bazasına hücum təşkil edərək 3 amerikalı dənizçinin həlakına səbəb olan Məhəmməd Əlşamrani adlı terroçuya aiddir.

Bu ilin fevralının əvvəlində Apple-a göndərilən məktubda FBI müşaviri Dana Boente cihazı araşdırmaq üçün məhkəmədən order olduğunu, ancaq telefonun şifrəsini aça bilmədiklərini deyərək şirkətdən kömək tələb edib.

Sözügedən hücumla bağlı məhkəmə iclasında çıxış edən FBI direktoru Kristofer Vrey hələ də şifrəni aça bilmdiklərini deyib. Apple-ın köməyinə ümid etdiklərini bildirən baş prokuror Uilyam Barr və prezident Donald Tramp da bu məsələdə texnologiya nəhəngindən kömək istəyiblər.

Apple isə iCloud məlumatlarını verdiyini bildirərək cihazda "arxa qapı" açmayacağında israrlıdır. Apple hesab edir ki, bu addım milli və müştəri təhlükəsizliyinə xələl gətirə bilər.