''Bu, ''Qarabağ''la bizim aramızda olan fərqi göstərir'' - ''Keşlə''nin legioneri

Tarix: 8 Mart 2020 22:42

"Keşlə"nin futbolçusu Aleksandr Kristovao Azərbaycan Premyer Liqasının 20-ci turunda "Qarabağ"a 0:2 hesabı ilə məğlub olduqları matçdan sonra Qol.az-ın müxbirinin də iştirak etdiyi brifinqdə jurnalistlərin suallarını cavablandırıb.

- İlk hissədə 2 qol epizodumuz oldu. Onlardan birini 100 faiz dəyərləndirə bilərdik. Əfsuslar olsun ki, epizodlardan birini qaçırdıq. "Qarabağ"a qarşı çətin oyun oldu. Hər iki hissədə bizə müqavimət göstərə bildilər.

- 100 faizlik qol epizodunuz vardı. Zərbənizdən sonra top meydançadan çıxdı. Bunu necə şərh edərdiniz? 

- Bu epizod birbaşa "Qarabağ"la bizim aramızda olan fərqi göstərir. Biz qol vəziyyətlərini qaçırdıq. Amma onlar dəyərləndirə və lazımınca tamamlaya bilirdilər.

- "Qarabağ" çempionluğa oynayan komandadır. Başqa rəqiblərlə müqayisədə onların  gücünü hiss etdiniz?

- "Qarabağ"ın yaxşı heyəti var. Keyfiyyətli futbol oynadıqlarını hiss etdik. Onlar  hazırda birinci yerdədirlər. 

- Lorenzo Frutos komandanın  bombardiri olsa da, siz gələndən sonra ehtiyatda qalır, siz isə əsas heyətdə meydana çıxırsınız. Belə olacağını düşünürdünüzmü?

- Frutos yaxşı oyunçudur. Bu, baş məşqçinin seçimidir. Mən onun inamını doğrultmağa çalışıram və son dəqiqələrədək oynayıram.

- Qol vurmağınız üçün nə çatmır? Çempionatımız sizə ağır gəlir? Yəni, mane olan budur?

- Mən hər oyun epizodlar yaradıram və onları dəyərləndirməyə çalışıram. Təəsüf ki, qaçırdığım qol vəziyyətləri də olur. Amma mən öz üzərimdə işləyirəm, səbrli olub, keyfiyyətimi nümayiş etdirməyə çalışıram.