''Vaxt bizi sıxır'' - Elmar Baxşıyev

Tarix: 11 Iyun 2020 00:20

“Əsas tələbimiz, istəyimiz odur ki, futbolçuları zədədən qoruyaq. Məşq proseslərini buna uyğun qurmuşuq. Lakin nə qədər də çalışsaq, zədələr qaçılmazdır. Bugünkü matçı da bəzi aparıcı oyunçularımız məhz bu səbəbdən buraxdı".

Qol.az xəbər verir ki, bu sözləri "Qəbələ"nin baş məşqçisi Elmar Baxşıyev "Sumqayıt"la yoxlama oyunundan (2:2) sonra mətbuat konfransında deyib.

Komandanın aparıcı futbolçularından olan Amin Seydiyevin "Sabah" transferi haqda danışan 40 yaşlı məşqçi digər məsələlərə də toxunub:

"Amin Seydiyev müqavilə ilə “Qəbələ”yə məxsusdur. O, qarşıdakı mövsümdə karyerasını “Sabah”da davam etdirəcək. Amin elə oyunçudur ki, son gücünədək hazırda olduğu komandasına sərf edəcək. Futbolçuların psixoloji durumu qaydasındadır. Uzun müddət futboldan kənar qalsalar da, məşqlərə başlayanda problem yaranmadı. Onlar tapşırıqları maksimum yerinə yetirməyə çalışırlar. Vaxt azlığı var. Belə durumda olmamışdıq. Təlim-məşq toplanışına gedəndə də bilirdik ki, vaxtımız var və nəyin üzərində işləməliyik. Amma indi vaxt bizi sıxır. Bu sıxılmış vaxtda optimal komanda yaratmaq istəyirik. İnanıram ki, çempionat oyunlarında komanda getdikcə özünə bənzəyəcək. Mövsüm hələ bitməyib. Cari mövsümü layiqincə başa vurmaq, daha yüksək pilləyə qalxmaq istəyirik”.