''Avropa Parlamentinin bu bəyanatı normal beynəlxalq praktikadır''

Tarix: 12 Iyun 2020 17:45

"Heç kəsə sirr deyil ki, zəbt olunmuş torpaqlarda hansısa bir dövlət hansısa bir işlər aparırsa bu qanunsuzdur. Çünki onlarla müxtəlif sənədlər, qətnamələr var ki, orada həm işğal olunmuş ərazilərlə bağlı, eyni zamanda işğal edilmiş tərəfin fəaliyyəti ilə bağlı hansısa məsələlər pislənilir və yaxud da ki, ona qiymət verilir".  

Bunu Sonxeber.net-a açıqlamasında "Cənubi Qafqaz" politoloqlar klubunun rəhbəri İlqar Vəlizadə Avropa Parlamentinin Azərbaycan, Gürcüstan və Ermənistan üzrə Parlament Əməkdaşlıq Komitəsinin həmsədri Mariya Kalyurand, Azərbaycan üzrə məruzəçisi Jelena Zavko, Ermənistan üzrə məruzəçisi Trayan Basesku Ermənistan ilə Azərbaycanın işğal altında olan Dağlıq Qarabağ bölgəsi arasında əlaqə yaradacaq magistral yolun tikintisi ilə bağlı birgə bəyanatını şərh edərkən deyib.

O, bu bəyanat və ona oxşar digər sənədlərin hamısının Ermənistanın işğalının beynəlxalq norma və prinsiplərə zidd olaraq keçirməsindən xəbər verdiyinin bariz sübutu olduğunu bildirib:

"Bu, beynəlxalq norma və prinsiplərdir. Ona görə, Avropa Parlamentinin bu bəyanatı əslində bu normalara əsaslanır. Əslində, bu bəyanat və ona oxşar digər sənədlər hamısı Ermənistanın işğalının beynəlxalq norma və prinsiplərə zidd olaraq keçirməsindən xəbər verir. Hər şeyi öz adı ilə çağırıblar. Bu, əslində normal bir şeydir. Anormallıq olardı ki, Avropa İttifaqı, yaxud da hansısa başqa qurum Ermənistanın fəaliyyətini dəstəkləsin. Avropa Parlamentinin bu bəyanatı normal beynəlxalq praktikadır və bu, normal bir şeydir ki, onlar işğal olunmuş torpaqlara "işğal olunmuş torpaqlar" deyirlər. Biz o qədər öyrəşmişik ki, bir çox təsisatlar Dağlıq Qarabağ məsələsinə biraz yan baxırlar, artıq hər şeyi olduğu kimi göstərəndə bizə qəribə gəlir. Vəziyyət doğrudan da belədir. Ancaq qeyd etmək lazımdır ki, Aİ-nin ayrı-ayrı ölkələri Azərbaycanla sənədlər imzalayıb. Avropa İttifaqı özü Azərbaycanla müxtəlif sənədlər imzalayıb, orada Azərbaycanın ərazi bütövlüyünün dəstəklənməsi ilə bağlı xüsusi bənd var. Hamı bu sənədlərdə bitərəf olaraq Azərbaycanın ərazi bütövlüyünü dəstəkləyir. Sənədələrə uyğun bəyanat verilib".

Politoloq Azərbaycanın işğal altında olan Dağlıq Qarabağ ərazisi ilə arasında əlaqə yaradacaq magistral yolun tikintisində Ermənistanın əsas planını açıqlayıb:  

"Bu qətnamənin siyasi mahiyyəti ondan ibarətdir ki, Ermənistanın işğal olunmuş ərazilərdəki bütün fəaliyyəti pislənilir. Bu gün yol tikirlər, sabah başqa bir şey edirlər. Bunlar hamısı qanunsuz olur. Əgər yolun tikilməsi qanunsuzdursa, bu proses zəbt olunmuş torpaqlarda həyata keçirilirsə, deməli digər fəaliyyətləri də qanunsuzdur. Amma burada bir məsələ də var, onu vurğulamaq lazımdır ki, bu yol nə yoludur, bu üçüncü yolu ermənilər nəyə görə tikirlər? - Orada mövcud nəqliyyat infrastrukturası müharibə olsa Ermənistana Azərbaycan ərazilərinə canlı qüvvəsini və texnikasını dislokasiya olunmasına o qədər də böyük imkanlar yaratmır, çox dardır. Misal üçün, Laçın koridoru orada balaca bir serpantin yoldur. Bu yol ilə texnika və yaxud da canlı qüvvə çox hərəkət edə bilməz. Ona görə ermənilər əlavə yollar tikirlər ki, bura texnikasını və canlı qüvvəni dərhal dislokasiya etsinlər, iş orasındadır.

Əlbəttə ki, bu, işğalın birbaşa işarəsidir. Belə vəziyyətdə tikinti ilə bağlı şəkillər, videomateriallar göstərirlər. İri beton maşınlardan, digər texnkadan istifadə olunur. Bu o deməkdir ki, o çox bahalı yoldur. Ermənistan acından ölür. Pandemiya orada baş alıb gedir. Dərman, maska tapa bilmirlər. İş o yerə gəlib çıxır ki, Gürcüstana, başqa ölkələrə müraciət edirlər. Amma hərbi məqsədlə bu cür bahalı yol tikirlər. O deməkdir ki, Ermənistan hakimiyyəti öz xalqının qeydinə qalmır. Onların əsas məqsədi bu işğalçı siyasəti davam etdirmək, Azərbaycan torpaqlarını əldə saxlamaqdır. Bu, nə qədər baha başa gəlsə də, nə qədər camaatın zərərinə işləsə də Ermənistan hakimiyyəti o məsələlərə baxmır. Bu, bir daha onu göstərir ki, Azərbaycanın bu məsələdə mövqeyi haqlı mövqedir və bu mövqeyi digər beynəlxalq mötərəm beynəlxalq təşkilatlar dəstəkləyir".

Qeyd edək ki, Gorus-Xankəndi və Vardenis-Ağdərə yolundan sonra bu dəfə Ermənistanın Qeqarkunik vilayətinin Norabak kəndindən Zod aşırımından keçməklə Kəlbəcər rayonunun mərkəzinə yol çəkilir. Yeni yolun ümumi uzunluğu 25,5 kilometr olacaq. Tikinti işlərinin 2020-ci ilin ortalarında başa çatması gözlənilir. 

Təhməz Təkin